अहमदनगर । वीरभूमी - 08-May, 2021, 12:00 AM

सर्वात जास्त कोरोना बाधित आढळणार्‍या नगर शहराचा आकडा आज प्रथमच दुसर्‍या स्थानावर गेला आहे. मात्र संगमनेरने प्रथम क्रमांक व अकोलेने तृतीय क्रमांकावर येत चिंता वाढवली आहे.

आज शनिवारी जिल्ह्यातील अनेक तालुक्यातील आकडेवारी घटल्याने काहीसा दिलासा मिळाला आहे. आज जिल्ह्यातील कोरोना बाधितांचा आकडा 3612 वर आला आहे.

नगर जिल्ह्यातील कोरोना बाधितांची आकडेवारी पाठशिवणीचा खेळ खेळत असून दोन दिवस जास्त तर दोन दिवस कमी अशी कोरोना बाधितांची संख्या कमी जास्त होत आहे. आज प्रथमच नगर शहराची आकडेवारी दुसर्‍या स्थानावर आली आहे. मात्र संगमनेरने प्रथम तर अकोलेने तिसर्‍या स्थानावर येत अकोले, संगमनेरकरांची चिंता वाढवली आहे.

कोरोना सनसर्गाची साखळी तुटण्यासाठी अनेक तालुक्यात कडक लॉकडाऊन असतांनाही अत्यावश्यक सेवा बंद करून जनता कर्फ्यू पाळला जात आहे. मात्र तरीही कोरोना बाधितांचा आकडा दिवसेंदिवस वाढतच चालल्याने चिंता व्यक्त केली जात आहे.

आज आढळलेल्या कोरोना बाधितांमध्ये शेवगाव, जामखेडची आकडेवारी शंभरच्या आत आहे. यामुळे काही प्रमाणात दिलासा मिळाला आहे. मात्र मिळणारा हा दिलासा क्षणभराचा ठरत असल्याचा अनुभव असल्याने उद्या पुन्हा किती वाढतात याचीची चिंता लागून असते.

आज शनिवारी आढळलेल्या बाधितांमध्ये जिल्हा रुग्णांलयाच्या चाचणी अहवालात 1018, खाजगी प्रयोगशाळेतील तपासणी अहवालात 1945 तर अँटीजेन चाचणीत 649 असे 3612 कोरोना बाधित आढळून आले.

आज आढळलेल्या बाधितांमध्ये संगमनेर 442, नगर शहर 428, अकोले 364, नगर ग्रामीण 274, राहुरी 264, पारनेर 255, नेवासा 241, राहाता 235, श्रीरामपूर 229, कर्जत 227, पाथर्डी 193, कोपरगाव 146, श्रीगोंदा 122, इतर जिल्हा 64, भिंगार कन्टेन्मेंट 58, शेवगाव 38, मिलटरी हॉस्पिटल 15, जामखेड 13, इतर राज्य 04 असे रुग्ण आढळून आले.

जिल्ह्यातील अनेक तालुक्यात सध्या जनता कर्फ्यू आहे. तरीही या ठिकाणीही कोरोना बाधितांची संख्या वाढत असल्याने प्रशासन हतबल होत आहे. मात्र नागरिकांनी नियमाचे पालन करावे. विनाकारण घराबाहेर पडू नये, तोंडाला नियमित मास्क लावावा, नियमित हात स्वच्छ धुवावे, सॅनिटायझरचा वापर करावा व लसीकरण करून घेतले तर कोरोनावर विजय मिळवता येईल, असा विश्वास असल्याने दिलासा मिळत आहे.