शेवगाव । वीरभूमी- 11-May, 2021, 12:00 AM

शेवगाव तालुक्यातील खुंटेफळ येथे 11 वर्षीय मुलाची हत्या झाल्याची घटना सोमवारी सायंकाळी उघडकीस आली. घराशेजारी काम करत असतांना घरी मोबाईल आणण्यासाठी गेलेल्या बारा वर्षीय मुलाच्या मानेवर धारधार शस्त्राने वार करून हत्या करण्यात आली. हत्या झालेल्या मुलाचे नाव सार्थक आंबादास शेळके (वय 11 वर्षे) असे असून याप्रकरणी अज्ञाताविरोधात खुनाचा गुन्हा दाखल करण्यात आला आहे.

या घटनेने शेवगाव तालुका हादरला असून या बालकाची कोणी व कोणत्या कारणाने हत्या केली, याचा तपास लावण्याचे आव्हान शेवगाव पोलिसांसमोर उभे ठाकले आहे.

याबाबत पोलिसांकडून समजलेली माहिती अशी की, शेवगाव तालुक्यातील खुंटेफळ येथील अंबादास शेळके हे सोमवारी दुपारी आपल्या कुंबासमवेत घराशेजारी असलेल्या वाडग्यात काम करत होते. या दरम्यान सायंकाळी 4 वाजेच्या दरम्यान आंबादास शेळके यांनी आपला मुलगा सार्थक याला घरामध्ये असलेला मोबाईल घेऊन घेण्याचे सांगितले.

वडीलांनी मोबाईल आणण्याचे सांगितल्याने सार्थक हा घरामध्ये मोबाईल आणण्यासाठी गेला. बराच वेळ झाला तरी सार्थक का आला नाही, हे पाहण्यासाठी गेले असता सार्थक याच्या मानेवर धारदार शस्त्राने मानेवर वार झाल्याने खाली कोसळलेला दिसून आला. ही घटना सोमवारी सायंकाळी 4 ते 4.30 वाजेच्या दरम्यान घडली.

सार्थक याला तातडीने गावातील संतोष काळे यांच्या मदतीने मोटारसायकल वरून शेवगाव ग्रामीण रुग्णालयात उपचारासाठी घेऊन आले. तेथे त्याला तपासले असता सार्थक हा मयत झाल्याचे ग्रामीण रुग्णालयातील डॉक्टरांनी सांगितले.

या घटनेची माहिती कळताच शेवगाव पोलिस ठाण्याचे प्रभाकर पाटील यांनी पथकासह घटनास्थळी धाव घेत घटनास्थळाची पाहणी केली. याप्रकरणी मयताचे वडील आंबादास दत्तू शेळके यांनी दिलेल्या फिर्यादीवरून अज्ञाताविरोधात खुनाचा गुन्हा दाखल करण्यात आला आहे.

सार्थक शेळके याच्यावर स्वतःच्य घरातच असा अचानक हल्ला करून खून झाल्याने या घटनेने शेवगाव तालुक्यात खळबळ उडाली आहे. या खुनाचा तपास लावण्याचे आव्हान शेवगाव पोलिसांसमोर उभे राहीले आहे.