अहमदनगर । वीरभूमी - 12-May, 2021, 12:00 AM

जिल्ह्यातील कोरोना बाधितांच्या आकड्यामध्ये आज दुसर्‍या दिवशी घट झाली आहे. आज बुधवारी जिल्ह्यात 2711 कोरोना बाधित आढळले. या आकडेवारीमुळे नगरकरांना काहीसा दिलासा मिळाला आहे. अशीच आकडेवारी कमी होत राहीली तर लवकरच संपूर्ण जिल्हा लवकरच कोरोना मुक्त होईल असा विश्वास निर्माण होत आहे.

नेहमी कायम क्रमांक एकवर असलेल्या नगर शहराचा आकडा आजही कमी झाला आहे. तर अकोले तालुक्यात 275 कोरोना बाधित आढळल्याने पहिल्या क्रमांकावर उडी घेतली आहे.

आज प्रथमच एकाही तालुक्याची आकडेवारी तिनशेच्या पुढे नसल्याने जिल्ह्या वासीयांना दिलासा मिळत आहे. तर नेवासा, पाथर्डी, शेवगाव, जामखेड तालुक्याची आकडेवारी शंभरच्या आत आली आहे.

नागरिकांनी अशीच शिस्त पाळत नियमाचे पालन केल्यास जिल्ह्यातील आकडेवारी कमी होऊन संपूर्ण जिल्हा कोरोनामुक्त होईल असा विश्वास निर्माण होत आहे.

आज बुधवारी आढळलेल्या बाधितांमध्ये जिल्हा रुग्णांलयाच्या चाचणी अहवालात 136, खाजगी प्रयोगशाळेतील तपासणी अहवालात 1668 तर अँटीजेन चाचणीत 907 असे 2711 कोरोना बाधित आढळून आले.

आज आढळलेल्या बाधितांमध्ये अकोले 275, नगर ग्रामीण 268, संगमनेर 256, नगर शहर 250, पारनेर 244, राहाता 216, श्रीरामपूर 196, कोपरगाव 176, राहुरी 168, श्रीगोंदा 135, कर्जत 131, नेवासा 95, पाथर्डी 92, शेवगाव 66, इतर जिल्हा 63, जामखेड 62, भिंगार काँटोन्मेंट 12, मिलटरी हॉस्टिपीटल 04, इतर राज्य 02 असे रुग्ण आढळून आले.

जिल्ह्यातील अनेक तालुक्यात सध्या जनता कर्फ्यू असतांनाही कोरोना बाधितांची आकडेवारी वाढत आहे. यामुळे प्रशासन हतबल झाले असून नागरिकांनी सहकार्य करण्याचे आवाहन केले जात आहे.