अहमदनगर । वीरभूमी- 30-Dec, 2021, 11:46 PM

अहमदनगर जिल्ह्यातील मंत्री प्राजक्त तनपुरे, भाजपाचे ज्येष्ठ नेते आ. राधाकृष्ण विखे यांना कोरोनाची बाधा झाल्यानंतर राज्याचे महसूल मंत्री बाळासाहेब थोरात यांनाही कोरोनाची लागण झाली आहे. महसूलमंत्री बाळासाहेब थोरात यांनी नूतन जिल्हाधिकारी कार्यालयाच्या उद्घाटन कार्यक्रमास बुधवारी हजेरी लावली होती. यामुळे त्यांच्या संपर्कात आलेल्या व्यक्तींमध्ये चांगलीच खळबळ उडाली आहे.

दोन दिवसापुर्वी हिवाळी अधिवेशन संपले. या अधिवेशनादरम्यान काही मंत्री व आमदार यांच्यासह अधिवेशनास उपस्थित कर्मचारी, पोलिस व पत्रकार यांनाही कोरोनाची बाधा झाली होती. वाढता कोरोना संसर्ग विचारात घेत अधिवेशन संपवण्यात आले होते.

या अधिवेशनानंतर बुधवारी राज्यमंत्री प्राजक्त तनपुरे यांची कोरोना चाचणी अहवाल पॉझिटिव्ह आला होता. त्यानंतर आज गुरुवारी सकाळी भाजपाचे ज्येष्ठ नेते आ. राधाकृष्ण विखे यांची कोरोना चाचणी पॉझिटिव्ह आली होती. याबाबत या दोन्ही नेत्यांनी याबाबत आपल्या ट्विटर अकाऊंटवर माहिती देत संपर्कात आलेल्यांना कोरोना चाचणी करण्याची विनंती केली होती.

राज्य मंत्री प्राजक्त तनपुरे, आ. राधाकृष्ण विखे यांना कोरोना संसर्ग झाल्यानंतर आता राज्याचे महसूलमंत्री बाळासाहेब थोरात यांनाही कोरोनाची बाधा झाली आहे. याबाबत त्यांनी आपल्या ट्विटर अकाउंटवर माहिती दिली आहे.

त्यांनी म्हटले आहे की, माझी कोरोना चाचणी पॉझिटिव्ह आलेली आहे. मला कोणतेही लक्षणे नाही, तरीही डॉक्टरांच्या सल्ल्याने मी पुढील उपचार घेणार आहे. माझ्या संपर्कात आलेल्यांनी आपली कोरोना चाचणी करून घ्यावी. सगळ्यांना या निमित्ताने आवाहन करत आहे, आपण मास्क वापरावा, काळजी घ्यावी, असे आवाहन केले आहे.

महसूलमंत्री बाळासाहेब थोरात हे बुधवारी अहमदनगर जिल्हाधिकारी कार्यालयाच्या नूतन इमारतीच्या उद्घाटन कार्यक्रमाला प्रमुख पाहुणे म्हणुन उपस्थित होते. यामुळे त्यांच्या संपर्कात आलेल्यांमध्ये चांगलीच खळबळ उडाली आहे.