पाथर्डी । वीरभूमी- 09-Jan, 2022, 03:36 PM

पाथर्डी तालुक्यातील डमाळवाडी येथील एका 52 वर्षीय महिलेला ओमायक्रॉनची लागण झाल्याची माहिती तालुका आरोग्य अधिकारी डॉ. दराडे यांनी दिली. यामुळे पाथर्डी तालुक्यात ओमायक्रॉनचा शिरकाव झाला आहे.

यामुळे तालुक्यातील नागरिकांमध्ये भितीचे वातावरण तयार झाले असून नागरिकांनी भिती न बाळगता सतर्क राहुन काळजी घेण्याचे आवाहन आरोग्य विभागाने केले आहे.

याबाबत समजलेली माहिती अशी की, पाथर्डी तालुक्यातील डमाळवाडी येथील एका 52 वर्षीय महिलेला कोरोनाची लक्षणे आढळून आली होती. याची तपासणी केली असता या महिलेला ओमायक्रॉनची लागण झाल्याचे स्पष्ट झाले आहे. या महिलेवर नगर येथील खाजगी रुग्णालयात उपचार सुरू असल्याची माहिती तालुका आरोग्य अधिकारी डॉ. दराडे यांनी दिली आहे.

ही महिला डमाळवाडी येथे आपली सून व दोन नातवंडासह राहते. या महिलेने कोविड लसीचे दोन्ही डोस पूर्ण केलेले आहेत. तसेच या महिलेच्या सुनेचेही दोन्ही डोस पूर्ण झाले असून तीही कोरोना बाधित झाली आहे.

52 वर्षीय महिलेला ओमायक्रॉन असल्याचा अहवाल आल्यानंतर आरोग्य विभागाने महिलेल्या संपर्कात आलेल्यांची कोरोना तपासणी सुरू केली आहे. मात्र या घटनेने पाथर्डी तालुक्यात एकच खळबळ उडाली आहे.

नागरिकांनी भिती न बाळगता कोरोना प्रतिबंधक नियमांचे पालन करणे गरजेचे आहे. सध्या या महिलेवर नगर येथील खाजगी रुग्णालयात उपचार सुरू असल्याचे आरोग्य विभागाने सांगितले.