अकोले । वीरभूमी - 12-Jan, 2023, 11:23 PM

अकोले तालुका राष्ट्रवादी काँग्रेस पक्षाचे ज्येष्ठ नेते, अगस्ती सहकारी साखर कारखान्याचे विद्यमान उपाध्यक्ष अशोकराव भांगरे यांचे  हृदयविकाराच्या झटक्याने निधन झाले. गुरुवारी रात्री साडे आठ वाजता अचानक अस्वस्थ वाटू लागल्याने त्यांना नाशिक येथे उपचारासाठी घेऊन जात असतांना वाटेतच त्यांची प्राणज्योत मालवली.

अशोकराव भांगरे यांनी पंचायत समितीचे सदस्य, सभापती, जिल्हा परिषदेचे समाजकल्याण सभापती, जिल्हा परिषद अध्यक्ष, आदिवासी विकास महामंडळ सदस्य, प्रकल्प समितीचे सदस्य, जिल्हा सहकारी बँकेचे संचालक, अकोले तालुका एज्युकेशन सोसायटीचे उपाध्यक्ष आदी पदावर त्यांनी काम केले आहे. तसेच जनता दल, काँग्रेस, शिवसेना, भाजप, राष्ट्रवादी या पक्षात त्यांनी काम केले.

तालुक्यात त्यांना मानणारा मोठा गट आहे. माजी मंत्री मधुकरराव पिचड यांचे ते कट्टर राजकीय विरोधक होते. तर कधी त्यांच्यासोबत काम करणारे ज्येष्ठ नेते होते. मात्र त्यांनी कधीही राजकीय जीवनात विरोधकांविषयी अपशब्द वापरले नाहीत.

त्यांच्या निधनाचे वृत्त कळताच माजी मंत्री मधुकरराव पिचड यांनी दुःख व्यक्त केले असून माझ्यानंतर तालुक्याचे प्रतिनिधित्व करणारा अशोक हाच वारसदार होता. त्यांच्या निधनाने दुःख झाल्याचे ते म्हणाले. तर माजी आमदार वैभवराव पिचड यांनीही दुःख व्यक्त केले आहे. तसेच राष्ट्रवादी काँग्रेससह इतर पक्षातील सर्व नेते व कार्यकर्ते यांनी दुःख व्यक्त केले.

अशोकराव भांगरे यांच्यावर उद्या दि. 13 रोजी सकाळी शेंडी येथे अंत्यसंस्कार करण्यात येणार आहेत. त्यांच्या निधनाचे वृत्त समजताच सर्व तालुक्यावर शोककळा पसरली आहे.