नेवासा । वीरभूमी- 13-Jun, 2025, 05:43 PM

जिल्ह्यातील शनिशिंगणापूर देवस्थानने रात्रीचे दर्शन बंद करण्याचा निर्णय ताजा असतानाच आपल्या 167 कर्मचार्‍यांनाही चांगलाच झटका दिला आहे. या 167 कर्मचार्‍यांना ‘नारळ’ दिला आहे. त्यामध्ये 114 मुस्लिम कर्मचार्‍यांचा समावेश आहे. हिंदुत्ववादी संघटनांपुढे शनिशिंगणापूर देवस्थानच झुकल्याचा आरोप यानिमित्ताने होत आहे.

श्रीक्षेत्र शनिशिंगणापूर मंदिरात 114 मुस्लिम कर्मचार्‍यांची नियुक्ती करण्यात आली होती. या कर्मचार्‍यांनी गत 21 मे रोजी कथितपणे मंदिराच्या पवित्र चौथर्‍यावर जाऊन ग्रिल बसवले होते. तसेच, तेथील स्वच्छता व रंगरंगोटीही केली होती. हिंदुत्ववादी संघटनांनी यावर तीव्र आक्षेप घेत या कर्मचार्‍यांच्या हकालपट्टीची मागणी केली होती. तसेच या प्रकरणी 14 जून रोजी मंदिराबाहेर मोर्चा काढण्याचाही इशारा दिला होता. या इशार्‍यानंतर मंदिराच्या विश्वस्त मंडळाने ट्रस्टमध्ये 114 मुस्लिम कर्मचारी काम करतात, हे मान्य केले होते.

शेती विभाग, कचरा व्यवस्थापन व शिक्षणाशी संबंधित कामांमध्ये हे मुस्लिम कर्मचारी कार्यरत आहेत. 99 कर्मचारी मागील 5 महिन्यांपासून नोकरीवर अनुपस्थित आहेत. त्यामुळे त्यांचाही पगार बंद करण्यात आला आहे. उर्वरित 15 कर्मचारी अनेक वर्षांपासून ट्रस्टला आपली सेवा देत आहेत.

यातील काहींचा अनुभव 20 वर्षांहून अधिकचा आहे, असे विश्वस्त मंडळाने म्हटले होते. पण या प्रकरणी देवस्थानवरील दबाव वाढल्यानंतर अखेर त्यांनी 114 मुस्लिम कर्मचार्‍यांसह एकूण 167 जणांना कामावरून कमी केले. या सर्वांवर अनियमितता व शिस्तभंगाचा ठपका ठेवण्यात आला आहे.