पाथर्डी । वीरभूमी - 07-Jan, 2021, 12:00 AM

तालुक्याची कामधेनू असलेल्या श्री वृद्धेश्वर सहकारी साखर कारखान्याची निवडणूक रणधुमाळीस आज गुरुवारपासून सुरुवात झाली आहे. उमेदवारी अर्ज दाखल करण्याचा पहिला दिवस निरंक राहीला आहे. तर 13 इच्छुकांनी 28 उमेदवारी अर्ज व 7 जणांनी 13 मतदार याद्या नेल्या आहेत.

पाथर्डी तालुक्याची कामधेनू म्हणुन वृद्धेश्वर सहकारी साखर कारखान्याकडे पाहिले जाते. कोरोना संसर्गामुळे सुरु असलेल्या टप्प्यावर निवडणूक स्थगित करण्यात आली होती. मात्र सध्या कोरोना संसर्गाचा प्रादुर्भाव कमी झाल्यानंतर निवडणूक रणधुमाळी सुरू झाली आहे. वृद्धेश्वर सहकारी साखर कारखाना निवडणुकीसाठी निवडणूक अधिकारी म्हणुन पाथर्डी-शेवगावचे प्रांताधिकारी देवदत्त केकाण हे काम पाहणार आहेत.

वृद्धेश्वर सहकारी साखर कारखान्याच्या 19 जागेसाठी होणार्‍या निवडणुकीसाठी आजपासून उमेदवारी अर्ज दाखल करण्यास प्रारंभ झाला आहे. आज उमेदवारी अर्ज दाखल करण्याचा पहिला दिवस निरंक राहीला आहे. मात्र 13 जणांनी 28 उमेदवारी अर्ज तर 7 जणांनी 13 मतदार याद्या नेल्या आहेत.

उमेदवारी अर्ज व मतदार याद्या घेऊन जाणार्‍या उमेदवारांमध्ये गोरक्ष कारभारी फुंदे (1), अमोल अच्युतराव वाघ (4), गहिनीनाथ पाटीलबा ढाकणे (1), अंबादास धोंडीबा बळीद (1), परसराम नामदेव लोंढे (2), भाऊसाहेब मळू उघडे (2), रत्नप्रभा शेषराव कचरे (2), शेषराव सूर्यभान कचरे (2), वैभव पोपटराव आंधळे (2), मंगलताई अर्जुन राजळे (2), शिवशंकर अर्जुन राजळे (4), अर्जुन दादाबा राजळे (4), बापुसाहेब गोविंद घोरपडे (1) यांचा समावेश आहे.