श्रीगोंदा । वीरभूमी- 19-Oct, 2021, 12:00 AM

दारू पिण्यासाठी पैसे मागितल्याचा राग येऊन झालेल्या झटापटीत बापू विष्णू ओव्हळ (वय 70 वर्षे) या वृद्धाची हत्या करण्यात आली.

ही घटना काल सोमवार दि. 18 रोजी रात्री आठ वाजण्याच्या सुमारास श्रीगोंदा शहरातील बाजारतळाजवळ नगरपरिषदेच्या बंद गाळ्याच्या पाठीमागे लेंडी नाल्याजवळ झुडपामध्ये घडली आहे.

या झालेल्या वादात आणखी एक जण जखमी झाला आहे. श्रीगोंदा पोलिसांनी नामदेव सुनील भोसले उर्फ लंगड्या याला ताब्यात घेऊन अटक केली आहे.

याबाबत अधिक माहिती अशी की, सुनील भागचंद घोडके यांनी फिर्याद दिली की, बापू विष्णू ओहळ (वय 70 वर्षे, रा. पिसोरेखांड, ता. श्रीगोंदा, हल्ली रा. लिंपणगाव, ता. श्रीगोंदा) हे काही दिवसांपासून श्रीगोंदा बाजारतळाजवळ राहत होते.

काल सोमवारी रात्री घटनेतील आरोपी सुनिल भोसले याने मयत बापू ओहळ यांच्याकडे दारू पिण्यासाठी पैसे मागितले. त्यातून झालेल्या वादात आरोपीने मयत ओहोळ यांच्या नाका-तोंडावर हाताने ठोसे मारुन जखमी केले व गळ्याला कपड्याने आवळुन खून करुन पुरावा नष्ट करण्याच्या उद्देशाने त्यांना फरफटत नेऊन श्रीगोंदा नगर परीषदचे बंद गाळ्याचे बाजुला लेंडी नाल्याजवळ झुडपामध्ये नेवुन टाकले.

झुडपामध्ये मृतदेह आढळल्यानंतर या वृद्धाच्या हत्येही घटना उघडकीस आली. पोलिसांनी आरोपी नामदेव सुनिल भोसले उर्फ लंगड्या याला अटक केली आहे. या घटनेचा पुढील तपास सपोनि. दिलीप तेजनकर हे करत आहेत.