अहमदनगर । वीरभूमी- 18-Dec, 2021, 02:39 PM

मागील काही दिवसापासून कोरोना बाधितांचा आकडा घटत आहे. नियमित घटत असलेल्या बाधितांमुळे जिल्ह्यातील उपचार घेणार्‍या रुग्णांची संख्याही घटली आहे. मात्र दोन दिवसापासून कोरोना बाधितांचा आकडा कासवगतीने वाढू लागला आहे.

आज शनिवारी जिल्ह्यात एकुण 58 कोरोना बाधित आढळले. शुक्रवारी जिल्ह्यात 48 कोरोना बाधित आढळले होते. यामध्ये आज 10 ने वाढ झाली आहे.

आज आढळलेल्या बाधितांमध्ये राहाता व नगर शहरातील आकडेवारी 10 एवढी आहे. तर शुक्रवारी इतर जिल्हा 7 तर पाथर्डी 5 अशी आकडेवारी होती. वाढत्या आकडेवारीमुळे प्रत्येकाने कोरोना प्रतिबंधक नियमांचे पालन करणे गरजेचे आहे.

कोरोना बाधितांचा आकडा घटत असला तरी नव्याने आलेल्या ओमायक्रॉन व्हेरिएंटमुळे काळजी घेण्याची गरज आहे. राज्यात ओमायक्रॉनचा शिरकाव झाला आहे. यामुळे नागरिकांनी कोरोना प्रतिबंधक लसीकरण करून नियमांचे पालन करावे, असे आवाहन करण्यात येत आहे.

आज शनिवारी आढळलेल्या बाधितांच्या आकडेवारीमध्ये जिल्हा रुग्णांलयाच्या चाचणी अहवालात 23, खाजगी प्रयोगशाळेतील तपासणी अहवालात 24 तर अँटीजेन चाचणीत 11 असे 58 कोरोना बाधित आढळून आले.

आज आढळून आलेली तालुकानिहाय आकडेवारी पुढीलप्रमाणे- राहाता 10, नगर शहर 10, नगर ग्रामीण 6, इतर जिल्हा 6, पाथर्डी 6, कोपरगाव 4, श्रीरामपूर 4, श्रीगोंदा 3, अकोले 2, नेवासा 2, शेवगाव 2, कर्जत 1, पारनेर 1, राहुरी 1 असे कोरोना बाधित आढळून आले. तर जामखेड, संगमनेर, भिंगार, मिलटरी हॉस्पिटल, इतर राज्ययेथील आकडेवारी शुन्यांवर आहे.

जिल्ह्यातील कोरोना बाधितांची आकडेवारी घटत चालली असली तरी नागरिकांनी कोरोना प्रतिबंधक नियमांचे पालन करणे गरजेचे आहे. यामध्ये विनाकारण घराबाहेर पडू नये, नियमित मास्कचा वापर करावा, सोशल डिस्टन्सिंग नियमांचे पालन करावे, सॅनिटायझरचा वापर करावा आणि कोरोना प्रतिबंधक लसीकरण करून घ्यावे, असे आवाहन करण्यात आले आहे.