अहमदनगर । वीरभूमी- 10-Jan, 2022, 03:07 PM

अहमदनगर जिल्ह्यात आज सोमवारी आढळलेल्या बाधितांच्या आकडेवारीत थोडीशी घट झाली आहे. मात्र आज आढळलेल्या बाधितांचा आकडा 244 असल्याने चिंता कायम आहे.

मागील पाच दिवसापासून कोरोना बाधितांचा आकडा वाढत असतांना आज सोमवारी 28 ने घट झाली आहे. यामुळे काही अंशी दिलासा मिळाला आहे. मात्र आज आढळलेल्या बाधितांमध्ये नगर शहराचा आकडा वाढल्याने चिंता व्यक्त होत आहे.

आज आढळलेल्या बाधितांमध्ये दुसर्‍या स्थानी नगर ग्रामीणचा क्रमांक लागतो. तर तिसर्‍या स्थानी कोपरगावचा क्रमांक लागतो. आज मिलटरी हॉस्पिटल येथील आकडेवारी शुन्यांवर आली आहे. तर नगर शहर, नगर ग्रामीण, संगमनेर, इतर जिल्हा, पारनेर, कर्जत, नेवासा येथील आकडेवारीत वाढ झाली आहे.

मागील सहा दिवसात तब्बल 1182 कोरोना बाधित आढळले आहेत. यामुळे सक्रीय रुग्ण संख्येचा आकडा रविवार पर्यंत 1093 एवढा होता. या आकडेवारीत आजही मोठी वाढ होणार असल्याने चिंता वाढली आहे.

आज सोमवारी अहमदनगर जिल्ह्यात आढळलेल्या कोरोना बाधितांमध्ये जिल्हा रुग्णालयाच्या लॅबमधील तपासणीत 43, खाजगी प्रयोगशाळा तपासणीत 167 तर रॅपिड अँन्टिजेन चाचणी अहवालात 34 असे एकुण 244 कोरोना बाधित आढळले आहेत.

आज आढळून आलेली तालुकानिहाय आकडेवारी पुढीलप्रमाणे- नगर शहर 84, नगर ग्रामीण 24, कोपरगाव 19, इतर जिल्हा 18, संगमनेर 13, अकोले 12, श्रीरामपूर 12, पाथर्डी 11, पारनेर 10, राहाता 10, नेवासा 7, श्रीगोंदा 7, राहुरी 6, भिंगार 4, कर्जत 3, इतर राज्य 2, जामखेड 1, शेवगाव 1 असे कोरोना बाधित आढळून आले. तर एकमेव मिलटरी हॉस्पिटल येथील आजची रुग्ण संख्या शुन्यांवर आहे.

मागील तीन दिवसापासून एकुण आकडेवारीने दोनशेचा आकडा पार केला आहे. या तुलनेत डिस्चार्ज होणार्‍या रुग्णांची कमी असल्याने चिंता वाढली आहे. यामुळे नागरिकांनी नियमित मास्क वापरावा, सॅनिटायझरचा वापर करावा, सोशल डिस्टन्सिंग नियमांचे पालन करावे व कोरोना प्रतिबंधक लसीकरण करून घ्यावे, असे आवाहन करण्यात येत आहे.