पारनेर । वीरभूमी - 27-Jan, 2022, 07:01 PM

राज्यातील १३५ नगरपंचायतीच्या नगराध्यक्ष पदांच्या आरक्षणाची सोडत आज गुरुवारी मंत्रालयात काढण्यात आली. यामध्ये पारनेर नगरपंचायतीच्या नगराध्यक्षपदाचे आरक्षण सर्वसाधारण पुरुष असे निघाले आहे.

तर नगर पंचायत मध्ये राष्ट्रवादी काँग्रेसने बहुमताचा आकडा गाठल्याने नगराध्यक्ष पदासाठी विजय सदाशिव औटी हे प्रमुख दावेदार झालेले आहेत.

पारनेर नगरपंचायतीसाठी झालेल्या सतरा जागेच्या निवडणुकीमध्ये त्रिशंकू निकाल लागल्यानंतर अपक्ष निवडून आलेल्या तीन नगरसेवकांनी राष्ट्रवादीत प्रवेश केल्याने राष्ट्रवादीचे संख्याबळ १० झालेले आहे.

या सदस्यांची राष्ट्रवादी काँग्रेसने गट नोंदणी केल्यानंतर गटनेता म्हणून विजय सदाशिव औटी यांचे नाव दिले आहे. त्यामुळे नगराध्यक्षपदासाठी ते प्रमुख दावेदार आहेत.

आज मुंबई येथे मंत्रालयात काढण्यात आलेल्या सोडतीमध्ये चिठ्ठीद्वारे नगरपंचायतीचे नगराध्यक्षपदाचे आरक्षण सर्वसाधारण पुरुष असे निघाल्याने आता राष्ट्रवादीचाच नगराध्यक्ष होणार हे जवळपास निश्चित झाले आहे.

तरीही आमदार निलेश लंके हे कोणाला संधी देतात हे पाहणे औत्सुक्याचे ठरणार आहे.