अकोले । वीरभूमी - 09-Feb, 2022, 05:48 PM

अकोले नगरपंचायत नगराध्यक्षपदी भाजपाकडून सोनालीताई नाईकवाडी तर शिवसेना-राष्ट्रवादी आघाडीकडून नवनाथ शेटे यांनी अर्ज दाखल केले आहेत. अकोले नगरपंचायतीत भाजपाचे स्पष्ट बहुमत असल्याने सोनाली नाईकवाडी या नगराध्यक्ष होणार असल्याचे चित्र आहे.

अकोले नगरपंचायत निवडणूक झाल्यानंतर आज नगराध्यक्ष निवडीसाठी अर्ज दाखल करण्यात आले. सकाळी राष्ट्रवादी-सेना आघाडीचे वतीने शिवसेनेचे नगरसेवक नवनाथ शेटे यांनी अर्ज दाखल केला. त्यांना सूचक म्हणून नगरसेवक आरीफ शेख तर अनुमोदक म्हणुन श्वेताली रुपवते यांच्या सह्या आहेत.

तर भारतीय जनता पार्टीकडून नगरसेविका सोनालीताई नाईकवाडी यांनी अर्ज दाखल केला. त्यांच्या अर्जावर सुचक म्हणुन बाळासाहेब वडजे तर अनुमोदक म्हणुन हितेश कुंभार यांच्या सह्या आहेत.

सहाय्यक निवडणूक अधिकारी तथा मुख्याधिकारी विक्रम जगदाळे यांनी अर्ज स्वीकारले असुन 14 फेब्रुवारी 2022 रोजी सायंकाळी 4 वा पर्यत माघारीची मुदत आहे.

भारतीय जनता पार्टीच्या वतीने अर्ज दाखल करण्यापूर्वी भाजपा कार्यालयात माजी मंत्री मधुकरराव पिचड, माजी आ. वैभवराव पिचड, भाजपा सरचिटणीस नितीन दिनकर, भाजप युवा जिल्हाध्यक्ष श्रीराज डेरे यांनी मुलाखती घेऊन नगराध्यक्षपदासाठी भाजपा महिला आघाडी जिल्हाध्यक्ष सोनालीताई नाईकवाडी यांच्या नावाची घोषणा करुन सर्व 12 नगरसेवकांसह माजी आ. वैभवराव पिचड नगरपंचायत मध्ये जाऊन सोनालीताई नाईकवाडी यांचा अर्ज दाखल केला.

नगरपंचायतमध्ये भारतीय जनता पार्टीचे 12, राष्ट्रवादी काँग्रेस 2, शिवसेना 2 व राष्ट्रीय काँग्रेस 1 असे संख्याबळ आहे. सर्वाधिक 12 नगरसेवक भाजपाचे असल्याने जवळपास नगराध्यक्षपदी सोनालीताई नाईकवाडी यांचे नाव निश्चित मानले जात आहे. अर्ज माघारी 14 फेब्रुवारी रोजी सायंकाळी 4 वाजेपर्यंत असुन माघारी झाली नाही तर विशेष सभा 16 फेब्रुवारी रोजी होणार आहे.

यावेळी हातवर करुन मतदानाने निवड करण्यात येईल. तसेच उपनगराध्यक्षपदासाठीही याच दिवशी निवड करण्यात येणार आहे.