विजय उंडे । वीरभूमी- 23-Mar, 2022, 05:13 PM

श्रीगोंदा ः दाखल असलेल्या किरकोळ गुन्ह्यात अटक न करण्यासाठी श्रीगोंदा पोलिस ठाण्यातील अंमलदाराने लाचेची मागणी केल्याप्रकरणी अहमदनगर लाचलुचपत प्रतिबंधक विभागाकडून गुन्हा दाखल करण्यात आला आहे.

गुन्हा दाखल झालेला पोलिस अंमलदाराचे नाव संजय बबन काळे असे आहे. या कर्मचार्‍याला 2017 मध्ये तोफखाना पोलिस ठाण्यात नेमणुकीस असतांना लाच घेतांना पकडले होते. या घटनेने श्रीगोंदा तालुक्यात एकच खळबळ उडाली आहे.

याबाबत सविस्तर वृत्त असे की, श्रीगोंदा पोलिस ठाण्यात दाखल असलेल्या किरकोळ गुन्ह्यात तक्रारदाराच्या भावाची अटक टाळण्यासाठी व आरोपीच्या बाजूने मदत करण्यासाठी श्रीगोंदा पोलीस ठाण्यातील अंमलदार संजय बबन काळे (वय 32 वर्षे) याने दि. 10 मार्च 2022 रोजी तक्रारदारास 20 हजार रुपयांची लाच मागितली. यानंतर तडजोड होऊन 17 हजार रुपये लाचेची मागणी स्विकारण्याची तयारी दर्शविल्याने आज आरोपी संजय काळे याच्या विरुद्ध श्रीगोंदा पोलिस ठाण्यात गुन्हा दाखल करुन अटक करण्यात आली आहे.

विशेष म्हणजे आरोपी पोलिस अंमलदार संजय काळे हा 2017 साली तोफखाना पोलिस ठाण्यात नेमणुकीस असतांना लाच घेतांना रंगेहात पकडला होता. आता पुन्हा तक्रारदार यांचेकडे लाचेची मागणी केल्याने गुन्हा दाखल करण्यात आला आहे.

ही कारवाई लाचलुचपत प्रतिबंधक विभागाचे पोलीस उपअधीक्षक हरिष खेडकर यांच्या मार्गदर्शनाखाली सापळा अधिकारी पोलिस निरीक्षक शरद गोर्डे, पो. नाईक रमेश चौधरी, विजय गंगुल, पो. अंमलदार वैभव पांढरे, रविंद्र निमसे, बाबासाहेब कराड, चालक हरुन शेख, राहुल डोळसे यांच्या पथकाने केली आहे.