कर्जत । वीरभूमी- 16-Jun, 2022, 09:44 PM

माजीमंत्री राम शिंदे यांच्यावर भाजपा पक्ष श्रेष्ठींनी विधान परिषदेच्या उमेदवारी पाठोपाठ बारामती लोकसभा मतदारसंघाची जबाबदारी दिली आहे. राम शिंदे यांची बारामती लोकसभा मतदार संघाच्या प्रभारीपदी निवड केल्याने कर्जत-जामखेड मतदार संघातून शिंदे समर्थकांमधून स्वागत होत आहे.

माजी मंत्री राम शिंदे यांना नुकतीच विधान परिषदेची उमेदवारी देण्यात आली. या पाठोपाठ भाजपा पक्ष श्रेष्ठींनी राम शिंदे यांची बारामती लोकसभा मतदारसंघाच्या प्रभारीपदी नियुक्ती केली आहे. गुरुवारी संध्याकाळी भाजपाचे विरोधीपक्ष नेते माजी मुख्यमंत्री देवेंद्र फडणवीस यांनी राम शिंदे यांची नियुक्ती केली असल्याचे मुंबई येथे जाहीर केले.

यावेळी राम शिंदे यांच्यासह भाजपाचे महाराष्ट्र प्रदेशाध्यक्ष चंद्रकांत पाटील, माजीमंत्री आ. गिरीश महाजन उपस्थित होते. नुकतेच भाजपाकडून राम शिंदे यांना विधान परिषदेची उमेदवारी देत त्यांचे राजकीय पुनर्वसन करण्यात आले आहे.

या निवडीमुळे कर्जत-जामखेड मतदारसंघाचे विद्यमान आ. रोहित पवार यांना शह देण्यात आला होता. त्या पाठोपाठ राम शिंदेंना बारामती लोकसभा क्षेत्रासाठी प्रभारीपदी नियुक्ती दिल्याने कर्जत-जामखेड मतदारसंघात या नियुक्तीचे भाजपाकडून स्वागत करण्यात येत आहे.