पाथर्डी । वीरभूमी- 03-Jun, 2023, 12:27 AM

राष्ट्रवादी काँग्रेसचे महिला अहमदनगर जिल्हाध्यक्षपद अनेक दिवसांपासून रिक्त होते. या पदावर  जिल्हा परिषदेच्या माजी सदस्या योगिता शिवशंकर राजळे यांची नियुक्ती करण्यात आली आहे. या नियुक्तीचे पत्र राष्ट्रवादीच्या महिला प्रदेशाध्यक्ष विद्या चव्हाण यांनी आज प्रसिद्ध केले.

या नियुक्तीपत्रात पक्षाध्यक्ष शरद पवार यांचे विचार व पक्षाचे ध्येय धोरण चांगल्या पद्धतीने राबवावेत अशी अपेक्षा व्यक्त केली आहे. योगिता राजळे या पाथर्डी तालुक्यातील राष्ट्रवादीच्या महत्त्वाच्या महिला नेत्या समजल्या जातात.

जिल्हा परिषदेच्या माजी उपाध्यक्ष मंजुषा गुंड या राष्ट्रवादीच्या महिला जिल्हाध्यक्ष होत्या. त्यांनी वैयक्तिक कारणास्तव मागील वर्षी पदाचा राजीनामा दिल्यापासून हे पद रिक्त होते. या पदासाठी अनेक नावे समोर आली होती. मात्र राष्ट्रवादीच्या वरिष्ठ नेत्यांनी राजळे यांच्या नावाला सहमती दर्शविल्याचे समजते.

यानिमित्ताने पक्ष संघटनेतील महत्त्वाचे पद पाथर्डी तालुक्याला मिळाले असल्याने पाथर्डी तालुका राष्ट्रवादी काँग्रेसमध्ये मोठे चैतन्याचे वातावरण आहे. राजळे यांना जिल्हा परिषदेतील कार्यकाळाचा मोठा प्रशासकीय अनुभव असल्याने राजळे यांच्या नेतृत्वाखाली राष्ट्रवादी महिला आघाडी व पक्ष संघटन आणखी मजबूत होईल, अशी आशा पक्षाला आहे.

राष्ट्रवादी काँग्रेसचा वर्धापन दिन कार्यक्रमा पूर्वी महिला जिल्हाध्यक्षांची नियुक्ती करण्यात आली आहे.