अकोले । वीरभूमी - 28-Nov, 2020, 12:00 AM

जिल्ह्यातील विविध भागात बिबट्याचा वावर असल्याने भीतीचे वातावरण निर्माण झाले आहे. मात्र अकोले तालुक्यातील आंबड परिसरातील मुक्ताईवाडी येथील एका विहिरीत बिबट्या मृतावस्थेत आढळून आला. आढळून आलेल्या बिबट्या ही मादी असून या भागात आणखी बिबट्या असल्याची शक्यता वर्तविली जात आहे.

तालुक्यातील आंबड परिसरातील मुक्ताईवाडी येथील गवराम वाळीबा जाधव हे आपल्या विहिरीवर विद्युत मोटार सुरू करण्यासाठी गेले असता त्यांना हा बिबट्या विहिरीच्या पाण्यावर मृत अवस्थेत तरंगताना आढळून आला. त्यांनी याबाबत सरपंच दत्तू जाधव यांना माहिती दिली.

तर सरपंच यांनी वनविभागाला ही घटना कळविली. यानंतर वनपाल व्ही. एन. पारधी यांनी घटनास्थळी भेट देऊन ग्रामस्थांच्या मदतीने मृत बिबट्यास विहिरीबाहेर काढण्यात आला. सदरील बिबट्या हा मादी बिबट्या असून वय 2 ते अडीच वर्षांचे आहे. शिकारीच्या मागे लागताना हा बिबट्या विहिरीत पडला असावा, असा अंदाज वनरक्षक ज्ञानेश्वर कोरडे यांनी व्यक्त केला.

वन विभागाच्या सुगाव येथील नर्सरीत या बिबट्याचे पशु वैद्यकीय अधिकारी डॉ. भांगरे यांनी शवविच्छेदन केले. या नंतर शासकीय नियमानुसार या बिबट्याचा अंत्यविधी करण्यात आला.