अहमदनगर । वीरभूमी - 18-May, 2021, 12:00 AM

जिल्ह्यातील कोरोना बाधितांच्या संख्येत आज सोमवारच्या तुलनेत 56 ने वाढ झाली आहे. मात्र मागील आठवड्यापेक्षा आकडेवारीत चांगलीच घट झाल्याने नगरकरांना आजही दिलासा मिळाला आहे.

जिल्ह्यातील कोरोना बाधितांच्या आकड्यामध्ये कमी जास्तचा शिवनापाणीचा खेळ सुरू असतांना दोन दिवसापासून आकडेवारीत घट झाली आहे. रविवारी व सोमवारी आकडेवारीत घट झाल्यानंतर आज मंगळवारी 56 ने वाढ झाली आहे. ही वाढ अल्पशी असल्याने नगरकरांना दिलासा मिळाला आहे.

आज आढळलेल्या बाधितांमध्ये सर्वाधिक आकडा हा नेवासा तालुक्यातील असून ती आकडेवारी 296 एवढी आहे. मात्र नेवासा वगळता इतर तालुक्याची आकडेवारी 200 च्या आत असल्याने थोडा दिलासा मिळाला आहे.

आज आढळलेल्या आकडेवारीत नेवासा पाठोपाठ पाथर्डी, पारनेर, राहुरीचा क्रमांक लागतो आहे. तर अनेक दिवस उच्चांक करणार्‍या राहाता तालुक्याची आकडेवारी प्रथमच 98 वर आली आहे. जामखेड तालुक्याची आकडेवारीही 85 वर असून इतर तालुके शंभरच्या पुढे आहे.

अशीच आकडेवारी कमी होत राहीली तर संपूर्ण जिल्हा लवकरच कोरोनामुक्त होईल, अशी आशा व्यक्त केली जात आहे. त्यातच आता विनाकारण फिरणार्‍यांची जागेवरच अँटीजेन चाचणी करण्याच्या निर्णयामुळे घराबाहेर पडणार्‍यांची संख्या घटून कोरोना बाधितांची संख्या कमी होण्यास मदत होणार आहे.

आज मंगळवारी आढळलेल्या बाधितांमध्ये जिल्हा रुग्णांलयाच्या चाचणी अहवालात 268, खाजगी प्रयोगशाळेतील तपासणी अहवालात 694 तर अँटीजेन चाचणीत 1199 असे 2161 कोरोना बाधित आढळून आले.

आज आढळून आलेली आकडेवारी नेवासा 296, पाथर्डी 180, पारनेर 164, राहुरी 161, श्रीरामपूर 143, कर्जत 134, नगर शहर 131, नगर ग्रामीण 131, कोपरगाव 129, श्रीगोंदा 123, संगमनेर 114, शेवगाव 113, अकोले 110, राहाता 98, जामखेड 85, इतर जिल्हा 46, भिंगार कँटोन्मेंट 03 असे कोरोना बाधित आढळले आहेत.

नागरिकांनी विनाकारण घराबाहेर पडू नये, नियमित मास्क लावा, हात स्वच्छ धुवावे व शासनाने ठरवून दिलेल्या नियमाचे पालन करावे, असे आवाहन करण्यात येत आहे.