अहमदनगर । वीरभूमी- 25-Jul, 2021, 12:00 AM

अहमदनगर जिल्ह्यात आज रविवारी कोरोनाचा महास्फोट झाला आहे. आज आढळलेली कोरोना बाधितांची आकडेवारी हजाराच्या पुढे गेली आहे. आज रविवारी नगर जिल्ह्यात तब्बल 1026 कोरोना बाधित आढळल्याने चिंता व्यक्त केली जात आहे.

आज जिल्ह्यात कोरोनाचा महास्फोट झाला असून पुन्हा एकदा पारनेर तालुका टॉपवर आहे. पारनेरने आज दोनशेचा आकडा पार केला आहे. तर जामखेड दुसर्‍या स्थानी असून 180 चा आकडा गाठला आहे. तसेच शेवगाव तिसर्‍या स्थानी आले असून 97 चा आकडा गाठला आहे.

नागरिकांच्या बेजबाबदारपणामुळे जिल्ह्यातील कोरोना बाधितांच्या आकड्यात मोठी वाढ झाली आहे. अनेक दिवसाच्या प्रतीक्षेनंतर हजाराचा आकडा पार केला आहे. याला कारणीभूत ठरत आहेत ते विवाह सोहळे व राजकीय कार्यक्रम. मात्र प्रशासन व नागरिक याकडे दुर्लक्ष करत असल्याचे दिसून येत आहे.

कासवगतीने वाढत असणार्‍या रुग्णसंख्येने चिंता व्यक्त केली जात आहे. कोरोना संसर्ग टाळण्यासाठी नागरिकांनी विनाकारण घराबाहेर पडू नये, नियमित मास्क वापरावा, नियमित स्वच्छ हात धुवावे, सॅनिटायझरचा वापर करावा, सोशल डिस्टन्सिंग नियमाचे पालन करावे, असे आवाहन करण्यात येत आहे.

आज रविवारी आढळलेल्या बाधितांच्या आकडेवारीमध्ये जिल्हा रुग्णांलयाच्या चाचणी अहवालात 246, खाजगी प्रयोगशाळेतील तपासणी अहवालात 398 तर अँटीजेन चाचणीत 382 असे 1026 कोरोना बाधित आढळून आले.

आज आढळून आलेली तालुकानिहाय आकडेवारी पुढीलप्रमाणे- पारनेर 210, जामखेड 180, शेवगाव 97, कर्जत 74, संगमनेर 70, नगर ग्रामीण 66, नेवासा 59, पाथर्डी 59, अकोले 52, राहुरी 43, राहाता 26, नगर शहर 23, कोपरगाव 19, श्रीरामपूर 19, श्रीगोंदा 17, इतर जिल्हा 12 असे कोरोना बाधित आढळून आले.