शेवगाव आगारातील धक्कादायक घटना
शेवगाव । वीरभूमी- 29-Oct, 2021, 10:51 AM
आगारात उभ्या असलेल्या एसटी बसच्या पाठीमागे दोराच्या साह्याने गळफास घेऊन चालकाने आत्महत्या केल्याची घटना आज शुक्रवारी सकाळी शेवगाव आगारात उघडकीस आली. आत्महत्या केलेल्या चालकाचे नाव दिलीप हरिभाऊ काकडे (रा.आव्हाणे खुर्द, ता. शेवगाव) असे आहे.
याबाबत समजलेली माहिती अशी की, आपल्या विविध मागण्यांसाठी एसटी कर्मचार्यांनी गुरुवारी संप पुकारला होता. संप असल्याने सर्व बसेस शेवगाव आगारात उभ्या होत्या. यापैकीच आगारात उभी असलेली बस क्र. एमएच. 40, एन 8849 च्या पाठीमागे चालक दिलीप हरिभाऊ काकडे (रा. आव्हाणे) यांनी दोराचे साह्याने गळफास घेतला.
ही घटना शुक्रवारी सकाळी 6:30 वाजेच्या दरम्यान उघडकीस आली. दिलीप काकडे हे शेवगाव आगारात चालक म्हणुन कार्यरत होते. संप असल्याने ते गुरुवारी आव्हाणे येथील आपल्या घरी होते. मात्र रात्री 10 वाजेच्या सुमारास घरातून निघून आल्याची माहिती आहे. आगारातील सुरक्षा रक्षकाने दिलीप काकडे यांचा मृतदेह एसटी बसच्या पाठीमागे लटकत असल्याचे पाहिल्यानंतर आरडाओरडा केला.
यानंतर अनेकांनी घटनास्थळाकडे धाव घेतली. घटनेची माहिती कळताच पोलिसांनी घटनास्थळी येऊन मृतदेह खाली उतरून घटनेचा पंचनामा केला. मृतदेह शेवगाव ग्रामीण रुग्णालयात उत्तरीय तपासणीसाठी पाठविण्यात आला आहे. या घटनेने तालुक्यात एकच खळबळ उडाली आहे.
EWzwAkUrbtpOo