शेवगाव तहसील समोरील घटना । आत्महत्येचे कारण अस्पष्ट
शेवगाव । वीरभूमी- 30-Nov, 2021, 10:04 AM
शेवगाव तहसील कार्यालयाच्या लोखंडी गेट समोर असलेल्या लिंबाच्या झाडाला दोराच्या साह्याने गळफास घेऊन तरुणाने जीवनयात्रा संपवल्याची घटना मंगळवारी सकाळी उघडकीस आली.
आत्महत्या केलेल्या तरुणाचे नाव भाऊसाहेब घनवट (वय 25, रा. नजिक बाभूळगाव) असे आहे. या घटनेने शहरासह तालुक्यात एकच खळबळ उडाली आहे.
याबाबत समजलेली माहिती अशी की, आज मंगळवार दि. 30 नोव्हेंबर रोजी सकाळी शेवगाव तहसील कार्यालयाच्या लोखंडी मुख्य गेट लगत असलेल्या लिंबाच्या झाडाला एका तरुणाने गळफास घेतल्याची घटना उघडकीस आली. लिंबाच्या झाडाला तरुणाचा मृतदेह लटकत असल्याचे पाहिल्यानंतर शेवगाव पोलिसांना कळविण्यात आले.
घटनेची माहिती कळताच शेवगाव पोलिस ठाण्याचे कर्मचारी आण्णा पवार व त्यांच्या सहकार्‍यांनी घटनास्थळी धाव घेत लिंबाच्या झाडावरून मृतदेह खाली उतरून घेतला. आत्महत्या केलेल्या तरुणाचे नाव भाऊसाहेब घनवट (वय 25, रा. नजिक बाभूळगाव, ता. शेवगाव) असे असून तो कापसाचा व्यापार करत असल्याची माहिती आहे.
पोलिसांनी मृतदेह उत्तरीय तपासणीसाठी शेवगाव ग्रामीण रुग्णालयात दाखल केला. पोलिसांनी नातेवाईकांना कळविले आहे. नातेवाईकांकडे चौकशी केल्यानंतर मृत्यूचे कारण समजू शकेल, असे सांगण्यात आले.
VvHsFIaKMwQC