संगमनेर । वीरभूमी - 28-May, 2022, 05:14 PM

शिर्डी येथून भिमाशंकरला देवदर्शनासाठी भाविकांना घेऊन जाणार्‍या टेम्पो ट्रॅव्हलरला आग लागून खाक झाला. वेळीच टेम्पो ट्रॅव्हलर मधील 10 भाविक खाली उतरल्याने मोठा अनर्थ टळला. ही घटना पुणे-नाशिक महामार्गावरील चंदनापुरी घाटात आज सकाळी 8 वाजेच्या दरम्यान घडली.

याबाबत समजलेली माहिती अशी की, शिर्डी येथील ट्रॅव्हलर चालक विजय कोंडीबा काकडे हे आज सकाळी शिर्डी येथून 10 भाविकांना घेऊन भिमाशंकरला चालले होते. भाविकांना घेऊन जाणारा टेम्पो ट्रॅव्हलर पुणे- नाशिक महामार्गावरील चंदनापुरी घाटातून जात असतांना टेम्पो ट्रॅव्हलरला आग लागली.

आग लागल्याची जाणीव होताच चालकाने गाडी थांबवून सर्व भाविकांना खाली उतरण्यास सांगितले. आग लागल्याची माहिती कळताच गाडीतील सर्व भाविक लागलीच खाली उतरले.

टेम्पो ट्रॅव्हलरला आग लागल्याची माहिती महामार्ग पोलिसांना कळताच त्यांनी घटनास्थळी धाव घेतली. सपोनि. सचिन सूर्यवंशी, पंढरीनाथ पुजारी, नारायण ठोकरे, योगीराज सोनवणे यांच्या पथकाने घटनास्थळी घेऊन आग विझविण्यासाठी अग्निशमन बंबला पाचारण केले.

संगमनेर नगरपरिषदेचा बंब घटनास्थळी दाखल होत आग विझवली. मात्र आग एवढी तीव्र होती की, काही क्षणातच टेम्पो ट्रॅव्हलर जळून खाक झाला.

प्रसंगावधान राखत चालकाने ट्रॅव्हलरमधील सर्वच्या सर्व 10 भाविकांना वेळेत खाली उतरविल्याने मोठा अनर्थ टळला. मात्र ही आग कशामुळे लागली हे समजू शकले नाही.

मागील काही दिवसापासून पुणे- नाशिक महामार्गावरील चंदनापुरी घाटात वाहनांना आग लागण्याच्या घटनामध्ये वाढ झाल्याचे दिसून येत आहे. यामुळे अशा घटना रोखण्यासाठी उपाय योजना करण्याची गरज निर्माण झाली आहे.