शेततळ्यात बुडून बाप-लेकीचा मृत्यू

अकोले तालुक्यातील वीरगावच्या सुपारमाळ शिवारात सोमवारी दुपारी 1.30 वाजेच्या दरम्यान घराशेजारील शेततळ्यात बुडून वडील आणि मुलीचा दुर्दैवी मृत्यू झाला.

या दुर्घटनेत कृष्णकांत जगन्नाथ थोरात (वय 43 वर्षे) आणि त्यांची दहावीत शिकत असलेली मुलगी आश्विनी कृष्णकांत थोरात (वय 16 वर्षे) या दोघांचे निधन झाले.

सोमवारी दुपारी 1.30 वा. आश्विनी राहते घराशेजारील शेततळ्याजवळून जात असताना पाय घसरुन पडली. तिचा आरडाओरडा ऐकून घरातील व्यक्ती पळतच शेततळ्याजवळ गेल्या. मुलीला वाचविण्यासाठी कृष्णकांत थोरात यांनी शेततळ्यात उडी घेतली.

शेततळे पुर्ण भरलेले असल्याने व त्यातील कागद आणि शेवाळामुळे दोघांनाही कडेला येता आले नाही. यामुळे दोघांचाही शेततळ्यातील पाण्यात बुडून मृत्यू झाला.

या दरम्यान शिवारातून आणि गावातूनही लोक जमा झाले होते. दीपक दातीर, करीम इनामदार यांनी शेततळ्यातून दोन्ही मृतदेह बाहेर काढले. त्यावेळी त्यांचे कुटुंबियांचा आकांत हृदयद्रावक होता.

मयत कृष्णकांत थोरात यांचे पश्चात पत्नी, आई, मुलगा, मुलगी, मामा-मामी असा परिवार आहे. अकोले येथील ग्रामीण रुग्णालयात दोघांचे शवविच्छेदन झाल्यानंतर शोकाकूल वातावरणात दोघांवर वीरगाव येथील स्मशानभुमीत अंत्यसंस्कार करण्यात आले.

अकोले पोलिस स्टेशनला या घटनेची आकस्मात रजिस्टरला नोंद करण्यात आली आहे.