पारनेर नगरपंचायतीत मनसेचा स्वबळाचा नारा

पारनेर नगरपंचायतीच्या पंचवार्षिक निवडणुकीचा कार्यक्रम जाहीर झाल्यानंतर राष्ट्रवादी, शिवसेना, भाजप, वंचित बहुजन आघाडीसह शहर विकास आघाडी पूर्ण ताकतीने निवडणुकीच्या मैदानात उतरणार आहेत. त्याचप्रमाणे महाराष्ट्र नवनिर्माण सेनेने देखील पारनेर नगरपंचायत निवडणुकीमध्ये स्वबळावर लढण्याचे जाहीर केले.

पारनेर नगरपंचायत निवडणुकीत मनसे सक्रीय होत असल्याने अनेकांना यांचा फटका बसू शकतो. त्यामुळे नगरपंचायत निवडणुकीत मनसे काय करणार, कोण उमेदवार असणार आहेत? याकडे सर्वच राजकीय पक्षांचे लक्ष लागून राहिले आहे.

पारनेर शहर प्रमुख वसिम राजे यांनी नगरपंचायत निवडणुक विषयावर मनसे कार्यालयात कार्यकर्त्यांची बैठक आयोजित केली होती. यावेळी तालुकाध्यक्ष बाळासाहेब माळी बोलताना म्हणाले की, आपण नगरपंचायतीच्या सर्व जागा लढविणार आहोत. येणारी सत्ता ही मनसेच ठरविणार आहे. आत्ता पर्यंत सर्वानी पारनेरच्या पाणीप्रश्नावर निवडणुका जिंकल्या आहेत. मात्र यातून लोकांचा भ्रमनिरास झाला आहे. आता जनतेला विश्वासात घेऊन कार्यकर्त्यांनी कामाला सुरूवात करावी असे आवाहन केले.

यावेळी पारनेर शहराध्यक्ष वसिम राजे, सोपान गायकवाड, सतिष म्हस्के, गणेश तांबे, आकाश चेडे, राजेंद्र चत्तर, प्रतिक जाधव आदीसह अनेक मनसैनिक उपस्थित होते.