पारनेर नगराध्यक्षपदासाठी राष्ट्रवादी, शिवसेनेचे अर्ज दाखल

पारनेर नगरपंचायतीच्या नगराध्यक्षपदासाठी आज बुधवारी दाखल करण्यात आलेल्या अर्जामध्ये राष्ट्रवादी काँग्रेस पक्षाकडून विजय सदाशिव औटी तर शिवसेनेच्यावतीने नवनाथ तुकाराम सोबले यांनी अर्ज दाखल केले.

विजय औटी यांच्या अर्जावर योगेश अशोक मते यांनी सूचक म्हणून तर अनुमोदक म्हणून भूषण उत्तम शेलार यांनी स्वाक्षर्‍या केल्या आहेत. तर शिवसेनेचे नवनाथ तुकाराम सोबले यांच्या अर्जावर सूचक म्हणून विद्या अनिल गंधाडे तर अनुमोदक म्हणून नीता देवराम ठुबे यांनी स्वाक्षर्‍या केल्या आहेत.

निवडणूक निकालानंतर राष्ट्रवादी काँग्रेसने अपक्षांना बरोबर घेऊन 9 नगरसेवकांची गट नोंदणी जिल्हाधिकारी कार्यालयात केलेली होती. त्यानंतर अपक्ष नगरसेवक योगेश मते यांनीही राष्ट्रवादीबरोबर जाण्याचा निर्णय घेतल्याने राष्ट्रवादीची संख्या 10 पर्यंत पोहोचली आहे. तर शिवसेनेचे 6 व भाजपाचा 1 असे 17 नगरसेवकांची संख्या आहे.

बुधवार दि. 16 रोजी नगराध्यक्षा बरोबरच उपनगराध्यक्ष पदाची निवड होणार असून उपनगराध्यक्ष पदासाठी कोण याकडे सर्वांचे लक्ष लागले आहे.