भरधाव कंटेनरची अ‍ॅपे रिक्षाला धडक

भरधाव कंटेनरने रिक्षाला जोराची धडक दिल्याने झालेल्या अपघातात सहा जणांचा मृत्यू झाला तर चार जण गंभीर जखमी झाले. हा अपघात कोपरगाव तालुक्यताल डाऊच खुर्द परिसरातील झगडे फाटा ते कोपरगाव महामार्गावर घडला.

घटनेची माहिती कळताच कोपरगाव शहर पोलिसांनी घटनास्थळी धाव घेत मदत कार्य केले. या अपघातात मयत झालेल्यांमध्ये दोन विद्यार्थींनीसह दोन महिला व दोन पुरुषांचा समावेश असल्याचे समजते.

मयताची नावे आत्माराम जम्मानसा नाकोडे (वय 65, रा. वावी, ता. सिन्नर), राजाबाई साहेबराव खरात (वय 60, रा. चांदेकसारे, ता. कोपरगाव), शिवाजी मारुती खरात (वय 52), शैला शिवाजी खरात (वय 42, दोघे रा. श्रीरामपूर), पुजा नानासाहेब गायकवाड (वय 20, रा. हिंगणवेढे), प्रगती मधुकर होन (वय 20, रां चांदेकसारे, ता. कोपरगाव) अशी आहेत.

तर विलास साहेबराव खरात (वय 34), कावेरी विलास खरात (वय 5, दोघे रा. चांदेकसारे), रुपाली सागर राठोड (वय 40), धृव सागर राठोड (वय 17, दोघे रा. सिन्नर), तर दुचाकीवरील दिगंबर चौधरी (वय 42) व त्यांचा मुलागा सर्वेश दिगंबर चौधरी (वय 12), कृष्णाबाई गोविंद चौधरी (वय 42, तिघे रा. पोहेगाव, ता. कोपरगाव) हे जखमी झाले.

याबाबत समजलेली माहिती अशी की, कोपरगाव ते मनमाड महामार्गावरील झगडे फाटा येथून अ‍ॅपे रिक्षा प्रवाशी घेऊन कोपरगावकडे जात होती. दरम्यान रिक्षा पगारे वस्ती जवळ आली असता कोपरगावहुन भरधाव वेगाने येत असलेल्या कंटेनरने रिक्षाला जोराची धडक दिली.

या अपघातात रिक्षाचा चक्काचूर झाला असून रिक्षामधील सहा प्रवाशांचा जागीच मृत्यू झाला. तर चार जण गंभीर जखमी झाले आहेत. या भरधाव कंटेनरने दोन दुचाकींनाही धडक दिल्याने दुचाकी चालकही जखमी झाले आहेत.

अपघाताची माहिती कळताच कोपरगाव शहर पोलिस ठाण्याचे कर्मचारी यांनी घटनास्थळी धाव घेत मदत कार्य केले.