श्रीगोंद्यात आजपासून तीन दिवस अतिक्रमण हटाव मोहीम

श्रीगोंदा शहरात बुधवार दि. 25 मे ते दि. 28 मे या कालावधीत मुख्य रस्त्यावरील सर्व अतिक्रमणे हटवण्यात येणार असल्याची माहिती श्रीगोंदा नगरपरिषदेचे मुख्याधिकारी मंगेश देवरे यांनी दिली आहे.

नगरपरिषद हद्दीतील जामखेड-दौंड रस्ता, मांडवगण रस्ता, शनिचौक ते जोधपूर मारुती चौक रस्ता व वडाळी रस्ता या मुख्य रस्त्यांवरील अतिक्रमणे हटवली जाणार आहेत. अतिक्रमणे कोणत्याही परिस्थितीत हटवण्याचा निर्धार पालिकेने केला आहे.

अतिक्रमण हटाव मोहीम राबवण्यासाठी दंगल नियंत्रण पथकासह जवळपास 50 ते 60 पोलिसांचा फौजफाटा तैनात करण्यात आला आहे. अतिक्रमण हटवण्याबाबत श्रीगोंदा नगरपरिषदेने वर्तमानपत्रात जाहीर नोटीस दिली होती. त्यामुळे गेल्या दोन दिवसांपासून अनेक छोट्या व्यवसायिकांनी व विक्रेत्यांनी आपली अतिक्रमणे स्वतःहून काढून घेण्यास सुरुवात केली आहे.

बुधवारपासून राबवण्यात येणार्‍या अतिक्रमण हटाव मोहिमेबाबत अनेकांच्या मनात संभ्रम असून यात मोठ्या व्यवसायिकांना अभय आणि छोट्या व्यवसायिकांवर अन्याय होत असल्याची भावना अनेक छोट्या टपरीधारक व्यावसायिकांनी व्यक्त केली आहे.

शहरात अनेक मोठ्या व्यावसायिकांची तर आजी-माजी आमदार, आजी-माजी नगरसेवक व अनेक प्रभावशाली राजकीय नेत्यांची अतिक्रमणे आहेत. नगरपरिषदेने आधी बड्यांवर कारवाई करावी आम्ही निमुटपणे आमची अतिक्रमणे काढू व आम्हाला आधी पर्यायी व्यवस्था निर्माण करून द्यावी, असे मत अनेक छोट्या व्यावसायिकांनी व्यक्त केली आहे.

तर अतिक्रमण हटवल्यामुळे शहराचा श्वास मोकळा होणार असून वाहतुकीस होणारा अडथळा दूर होण्यास मदत होईल, अशी प्रतिक्रिया नागरिकांमधून व्यक्त होत आहे.