पारनेरचे नगराध्यक्ष विजय औटी यांचा राजीनामा

पारनेर नगरपंचायतीचे नगराध्यक्ष विजय सदाशिव औटी यांनी गुरुवारी आपल्या नगराध्यक्ष पदाचा आणि नगरपंचायतीतील गटनेतेपदाचा राजीनामा नगरपंचायतीच्या मुख्याधिकार्‍यांकडे लेखी पत्राद्वारे दिला आहे. विजय औटी यांनी अचानक राजीनामा दिल्याने पारनेर शहरासह तालुक्यात खळबळ उडाली आहे.

विजय औटी यांनी आपल्या राजीनामा पत्रात म्हटले आहे, की जेव्हापासून मी पारनेर नगरपंचायतीच्या नगराध्यक्ष पदाचा कारभार हातात घेतला तेव्हापासून माझी व माझ्या कुटुंबाची प्रतिमा मलीन करण्यासाठी कट कारस्थाने रचू लागली. राजकीय वैमनस्यातून मला नगराध्यक्षपदाच्या खुर्चीवरून खाली खेचण्यासाठी सर्वोतोपरी प्रयत्न सुरू झाले.

अनेक जुनी प्रकरणे काढून माझ्यावर गुन्हे दाखल करण्याचे प्रयत्न विरोधकांनी केले असून या खोट्या गुन्ह्यांमुळे मी नगराध्यक्ष पदाला वेळ देऊ शकत नाही. नगराध्यक्षपदाची खुर्ची माझ्या कार्यात अडथळा ठरत असेल तर अशा खुर्चीवर मी तुळशीपत्र ठेवून आमदार नीलेश लंके यांचा एक कार्यकर्ता म्हणून व राष्ट्रवादी पक्षाचा एक सच्चा कार्यकर्ता म्हणून यापुढे काम करणार आहे.

विजय औटी हे नगराध्यक्ष झाल्यानंतर गेल्या सहा महिन्यात शासकीय कामात अडथळ्यासह जमीन खरेदीतून फसवणुकीचे पारनेर पोलिस ठाण्यात दोन गुन्हे दाखल झाले आहेत. त्यामुळे औटी यांना नगराध्यक्ष पदाचे कामकाज करताना अनेक अडीअडचणी येत आहेत.

सदर नगराध्यक्ष पदाच्या कामासाठी त्यांना वेळ देता येत नसल्याने त्यातूनच त्यांनी राजीनामा दिला असेल असे बोलले जात आहे.