तळणीत भरदिवसा घरफोडी

शेवगाव तालुक्यातील तळणी येथे भरदिवसा घर फोडून चोरी झाल्याची घटना घडली आहे. या  घटनेत चोरट्यांनी सोन्या-चांदीचे दागिणे व रोख रक्कम असा तब्बल 1 लाख 19 हजार रुपये किंमतीचा मुद्देमाल चोरुन नेला आहे. ही घटना सोमवारी दि. 17 रोजी भरदिवसा सकाळी 10.30 ते 5.30 या वेळेत घडल्याने परिसरात भितीचे वातावरण निर्माणझाले आहे.

याबाबत तळणी येथील ज्ञानेश्वर बापुसाहेब घनवट (वय 40) यांनी दिलेल्या फिर्यादीवरुन शेवगाव पोलिस ठाण्यात अज्ञात चोरट्याविरोधात गुन्हा दाखल करण्यात आला आहे.

फिर्यादीत घनवट यांनी म्हटले आहे की, सोमवार दि. 17 रोजी मी व कुटुंबातील सर्वजन तळणी गावापासून 3 किलोमीटर अंतरावर असलेल्या शेतात काम करण्यासाठी गेलो होतो. त्या दरम्यान सकाळी 10.30 ते सायकाळी 5.30 वाजेच्या दरम्यान अज्ञात कोणीतरी बंद घराचे कुलूप तोडून घरात प्रवेश करुन कपाटाची उचकापाचक करुन सोन्याची अंगठी, लहान मुलांच्या कानातील सोन्याच्या बाळ्या, सोन्याचे तीन ओम, हातातील मनगट्या, पायातील पैंजण व 80 हजार रुपये रोख रक्कम असा एकुण 1 लाख 17 हजार रुपये किंमतीचा मुद्देमाल चोरुन नेला.

घनवट कुटुंब शेतातील काम उरकुन घरी आल्यानंतर चोरी झाल्याची घटना उघड झाली. याप्रकरणी ज्ञानेश्वर घनवट यांनी दिलेल्या फिर्यादीवरुन शेवगाव पोलिस ठाण्यात गुन्हा दाखल केला आहे. भरदिवसा चोरीच्या घटनेने परिसरात भितीचे वातावरण निर्माण झाले आहे.