मढी देवस्थानच्या विश्वस्तपदाच्या निवडी जाहीर

भटक्यांची पंढरी म्हणुन ओळख असलेल्या पाथर्डी तालुक्यातील श्रीक्षेत्र मढी येथील श्री. कान्होबा उर्फ कानिफनाथ देव ट्रस्टच्या आज विश्वस्तपदाच्या निवडी जाहीर करण्यात आल्या. यामध्ये मढी गावातील मरकड कुटुंबाच्या विविध बेटामधून 6 जणांची तर इतर भाविकांमधून 5 जण अशा 11 विश्वस्तांच्या निवडी जाहीर करण्यात आल्या आहेत.

श्रीक्षेत्र मढी देवस्थानच्या विश्वस्तपदासाठी अर्ज मागविण्यात आले होते. यामध्ये मढी गावातील मरकड कुटुंबातून 6 जणांच्या तर इतर भाविकांमधून 5 जणांच्या निवडी जाहीर करण्यात आल्या. या निवडी दि. 12 नोव्हेंबर 2020 ते दि. 11 नोव्हेंबर 2025 पर्यंत असणार आहेत.

विश्वस्तपदावर आपली वर्णी लागावी म्हणुन अनेकांनी मुलाखती दिल्या होत्या. मात्र इतर भाविकांमधून फक्त 5 विश्वस्त निवडावे लागत असल्याने अनेकांच्या अपेक्षांवर पाणी फेरले गेले.

मढी देवस्थानच्या विश्वस्तपदी मढी गावातील मरकड कुटुंबातून सौ. विमल नवनाथ मरकड, भाऊसाहेब जनार्दन मरकड, डॉ. विलास रावसाहेब मढीकर, राधाकिसन अंबादास मरकड, शामराव आसराजी मरकड, संजय बाजीराव मरकड असा 6 जणांच्या निवडी करण्यात आल्या. तर इतर भाविकांमधून रवींद्र बाबुराव आरोळे, अर्जुनराव भगवानराव शिरसाट, अ‍ॅड. शिवाजी बलभिम डोके, सचिन हरीभाऊ गवारे, तान्हाजीराव रामचंद्र धसाळ अशा 5 जणांसह 11 विश्वस्तांच्या निवडी जाहीर करण्यात आल्या आहेत.