राष्ट्रवादीच्या कार्यकर्त्या रेखा जरे यांचा निघृण खून

दुचाकीला कट मारल्याच्या कारणातून राष्ट्रवादीच्या कार्यकर्त्या रेखा जरे यांची हत्या करण्यात आल्याची घटना सोमवारी रात्री 9 च्या सुमारास पारनेर तालुक्यातील जातेगाव घाटात घडली. घटनेनंतर धारधार शस्त्राने हल्ला करणारे दुचाकीवरील दोघे पसार झाले. हल्ला झाल्यानंतर जखमी अवस्थेत रेखा जरे यांना जिल्हा रुग्णालयात उपचारासाठी दाखल केले. मात्र त्या अगोदरच त्यांचा मृत्यू झाला होता. राष्ट्रवादी काँग्रेसचे स्थानिक आमदार संग्राम जगताप यांनी तातडीने जिल्हा रुग्णालयात जाऊन घटनेची सविस्तर माहिती घेतली.

राष्ट्रवादी काँग्रेसच्या कार्यकर्त्या व यशस्विनी महिला ब्रिगेडच्या अध्यक्षा रेखा भाऊसाहेब जरे या पारनेर तालुक्यातील जातेगाव घाटात असतानाच त्यांच्यावर प्राणघातक हल्ला करण्यात आला. हल्ल्यात गंभीररित्या जखमी झालेल्या रेखा जरे यांना काही वेळातच नगर जिल्हा रुग्णालयात नेण्यात आले. मात्र, त्याआधीच त्यांचा मृत्यू झाला होता.

रेखा जरे, त्यांचा मुलगा, त्यांची आई तसेच डॉ. माने या पुण्याहून काम उरकून येत असताना जातेगाव घाटात कारची काच एका दुचाकीला लागल्यामुळे वाद झाला. त्या वादातूनच रेखा जरे यांच्या मानेवर वार करण्यात आले व त्यातच त्यांचा मृत्यू झाला, अशी माहिती जरे यांच्या मुलाने पोलिसांना दिली आहे. दुचाकीवर दोन जण होते. ते नेमके कोण होते, याबाबत अधिक तपशील अजून मिळालेला नाही, असे उपविभागीय पोलीस अधिकारी विशाल ढुमे यांनी स्पष्ट केले.