रासायनिक खतांच्या दरवाढीवरून स्वाभिमानी आक्रमक

कोरोना महामारीबरोबरच रासायनिक जगाचा पोशिंदा असलेल्या बळीराजाच्या शेतीमालाला हमीभाव मिळत नाही. तर दुसरीकडे रासायनिक खतांची दरवाढ सुरू आहे.

केंद्र सरकारने रासायनिक खतांची दरवाढ तातडीने मागे न घेतल्यास स्वाभिमानी शेतकरी संघटना भाजपा खासदार, आमदारांना काळे झेंडे दाखवून निषेध करण्याचा इशारा स्वाभिमानी शेतकरी संघटनेचे जिल्हा उपाध्यक्ष दत्तात्रय फुंदे यांनी दिला आहे.

याबाबत प्रसिद्धीस दिलेल्या निवेदनात स्वाभिमानी शेतकरी संघटनेचे दत्तात्रय फुंदे यांनी म्हंटले आहे की, सन 2022 पर्यंत शेतकर्‍यांचे उत्पन्न दुप्पट करू अशी घोषणा माननीय पंतप्रधान नरेंद्र मोदी यांनी निवडणुकीच्यावेळी केल्याने शेतकर्‍यांनी त्यांना भरघोस मतदान केले. परंतु आजची परिस्थिती पाहिली तर प्रत्येक खताच्या गोणी मागे 700 ते 800 रुपये दरवाढ कोणतीही पूर्वसूचना न देता केली आहे.

या दरवाढीमुळे शेतकर्‍यांचे उत्पन्न दुप्पट होण्यापेक्षा शेतकरी संपवण्याच्या मार्गावर केंद्र सरकार आहे की काय? असा प्रश्न निर्माण झाला आहे. त्यातच सध्या कोरोना परिस्थितीमुळे शेतकरी हैराण झालेला आहे. त्यातच पेट्रोल-डिझेलची दरवाढ सुरू आहे. यामुळे शेतीमशागतीचा खर्चही वाढला आहे.

सध्या कोरोना संसर्गामुळे सर्वत्र लॉकडाऊन आहे. यामुळे शेतात पिकवलेला मालही विकता येत नाही. त्यामुळे पिकासाठी केलेला खर्चही निघत नाही. त्यातच खरीप हंगामामध्ये खतांचे दर अचानक वाढल्याने केंद्र सरकारने शेतकर्‍यांच्या पाठीत खंजीर खुपसला आहे.

रासायनिक खताची होणारी दरवाढ तातडीने मागे न घेतल्यास स्वाभिमानी शेतकरी संघटनेच्यावतीने भाजपा खासदार व आमदार यांना काळे झेंडे दाखवून निषेध करण्याचा इशारा जिल्हा उपाध्यक्ष दत्तात्रय फुंदे यांनी दिला आहे.