तहसीलदार ज्योती देवरे यांची अखेर बदली

पारनेरच्या वादग्रस्त तहसीदार ज्योती देवरे यांची अखेर आज बदली झाली आहे. देवरे यांची बदली तहसीलदार (संगायो) अ, वर्ग न. पा. क्षेत्र जळगाव या तहसीलदार नामदेव पाटील यांच्या प्रस्तावित रिक्त होणार्‍या जागेवर झाली आहे.

तहसीलदार ज्योती देवरे यांच्या बदलीचे आदेश आज दि. 13 रोजी राज्य शासनाचे सहसचिव डॉ. माधव वीर यांच्या सहीने निघाले आहेत. यामुळे आ. निलेश लंके व तहसीलदार ज्योती देवरे यांच्यातील वाद संपुष्टात येणार आहेत.

पारनेरच्या तहसीलदार ज्योती देवरे यांच्या विरोधात अनेकांनी नाशिक विभागीय आयुक्त यांच्याकडे तक्रारी केल्या होत्या. या तक्रारींची जिल्हाधिकारी राजेंद्र भोसले यांची चौकशी करून विभागिय आयुक्त कार्यालयाला अहवाल सादर केला होता.

या अहवालानुदार तहसीलदार ज्योती देवरे यांनी पदावर कार्यरत असतांना शासकीय कामकाजात कर्तव्य पारायणता ठेवलेली नसून शासकीय कर्तव्यव जबाबदार्‍या तत्परतेने पार पाडलेल्या नाहीत. तसेच नाशिक विभागीय आयुक्त यांनी शासनाला पाठविलेल्या अहवालानुसार तातडीची निकड विचारात घेता तहसीलदार ज्योती देवरे यांची तहसीलदार (संगायो) अ, वर्ग न. पा. क्षेत्र जळगाव या तहसीलदार नामदेव पाटील यांच्या प्रस्तावित रिक्त होणार्‍या जागेवर बदली करण्यात आली आहे.

या बदलीमुळे आ. निलेश लंके व तहसीलदार ज्योती देवरे यांच्यातील वाद संपुष्टात येणार आहे. आता पारनेरला तहसीलदार म्हणुन कोणाची वर्णी लागते, याकडे पारनेर तालुक्यासह जिल्ह्याचे लक्ष लागले आहे.