दरोडेखोरांच्या सशस्त्र हल्यात तीघे जबर जखमी

पाथर्डी शहरातील जुन्या नगर रस्त्यावरील (खेर्डे पानंद) बोरूडे वस्ती येथील देविदास नामदेव बोरूडे यांच्या घरावर अज्ञात दरोडेखोराकडून चोरीच्या उद्देशाने सशस्त्र हल्ला करण्यात आला. बोरुडे यांनी दरोडेखोरांना प्रतिकार केला असता दरोडेखोरांनी संदीप नामदेव बोरूडे, देविदास नामदेव बोरूडे, त्यांची वयोवृद्ध आई पार्वती नामदेव बोरुडे यांच्यावर धारदार शस्त्राने हल्ला करून जबर जखमी करत मोठा ऐवज पळविला, असल्याची प्राथमिक माहिती मिळत आहे.

दरोडेखोरांच्या मारहाणीतील गंभीर जखमींना उपचारासाठी प्रथम पाथर्डीच्या उपजिल्हा रुग्णालयात दाखल केले. मात्र तिघांची प्रकृती गंभीर असल्याने त्यांना उपचारासाठी मध्यरात्री अहमदनगर येथे हलवण्यात आले आहे. अचानक झालेल्या दरोडेखोरांच्या हल्ल्यामुळे पाथर्डी शहराचा संपूर्ण परिसर हादरला आहे. या घटनेने नागरिकांमध्ये मोठी घबराट पसरली आहे.

हा हल्ला झाल्यानंतर बोरुडे यांनी आरडाओरडा केल्याने शेजारी राहणारे लक्ष्मण बोरुडे, अक्षय बोरुडे, महेश वायकर, उमेश साखरे, रमेश साखरे, पोपट साखरे, सचिन साखरे व परिसरातील इतर घटनास्थळाकडे धावून आले. यानंतर दरोडेखोरांनी तेथून पळ काढला. याबाबत हल्ल्यातील जखमी नगरला उपचार घेत असल्याने अजून गुन्हा दाखल झालेला नव्हता.

पोलिसांनी याबाबत गांभीर्याने दखल घेत जलद गतीने तपास करून दरोडेखोरांना अटक करावी. येथील वस्त्यांना पोलीस संरक्षण देऊन रात्रीची पोलीस गस्त वाढवावी. असा गंभीर प्रकार पुन्हा घडू नये, यासाठी कठोर पावले उचलावीत, अशी मागणी परिसरातील नागरिकांनी केली आहे.