खोटी माहिती पसरवून बदनामी करणार्यावर गुन्हा दाखल
वीरभूमीच्या बातमीच्या हेडलाईनमध्ये केली छेडछाड । पाथर्डी पोलिस ठाण्यात गुन्हा दाखल
शेवगाव तालुक्यातील नजिक बाभूळगाव येथील गंगामाई साखर कारखान्याच्या इथेनॉल प्रकल्पाला आग लागल्याची बातमी सर्वप्रथम ‘वीरभूमी’ने दिली होती. मात्र या बातमीच्या हेडलाईनमध्ये बदल करुन ‘70 पेक्षा जास्त कामगार मृत्यूमुखी’ ही ओळ टाकून व्हॉटसअप ग्रुपवर लिंकसह शेअर करुन बदनामी करणार्यावर पाथर्डी पोलिस ठाण्यात गुन्हा दाखल करण्यात आला आहे.
गंगामाई साखर कारखान्याच्या इथेनॉल प्रकल्पाला आग लागल्याची बातमी ‘वीरभूमी’ने प्रसिद्ध केली होती. मात्र या बातमीच्या हेडिंगमध्ये बदल करुन ‘70 पेक्षा जास्त कामगार मृत्यूमुखी’ अशी ओळ टाकून ती बातमी अज्ञाताने वीरभूमीच्या लिंकसह इतर व्हॉटसअॅप गु्रुपवर शेअर केली. मात्र बातमीच्या लिंकमध्ये अशी कोणतीही माहिती नसल्याने अनेकांनी फोन करुन याबाबतची माहिती वीरभूमीचे संपादक महादेव दळे यांना दिली.
आगीमध्ये अशी कोणतीही घटना घडली नसतांना वीरभूमी व कारखाना प्रशासनाला बदनाम करण्याचा हा प्रयत्न असल्याचे समोर आले. यामुळे वीरभूमीचे संपादक महादेव दळे यांनी तातडीने सायब क्राईमशी संपर्क केला असता संबधित व्यक्तीविरोधात पोलिस ठाण्यात गुन्हा दाखल करण्याचे सांगण्यात आले.
यामुळे वीरभूमीचे संपादक महादेव दळे यांनी तातडीने पाथर्डी पोलिस ठाण्यात जावून चुकीची माहितीची ओळ वीरभूमीच्या लिंकला जोडून ती शेअर करुन वीरभूमीची बदनामी करणार्यांवर गुन्हा दाखल केला आहे. या घटनेचा तपास पाथर्डी पोलिस ठाण्याचे पोना. अनिल बडे हे करत आहेत.
सद्य परिस्थितीत इथेनॉल प्रकल्पाला आग लागली त्यावेळी 32 कामगार तेथे काम करत होते. आग लागल्यानंतर सर्व कामगारांना सुखरुप बाहेर काढण्यात आले. यामध्ये दोन जण किरकोळ जखमी झाले असून त्यांना उपचारासाठी शेवगाव येथील रुग्णालयात दाखल करण्यात आल्याची माहिती कारखान्याचे चेअरमन रणजितभैय्या मुळे यांनी दिली. तसेच कारखाना प्रशासनाविरोधात काही व्यक्तींकडून बदनामी करण्याच्या दृष्टीने अफवा पसरविल्या जात आहेत. अशा अफवा कोणीही पसरवू नये, असे आवाहन रणजित मुळे यांनी केले आहे.