गोळीबाराच्या घटनेने पाथर्डी तालुका हादरला

पाथर्डी तालुक्यातील सैदापूर (हत्राळ) गावामध्ये नातेसंबधाच्या वैमनस्यातून माणिक सुखदेव केदार यांच्यावर रिव्हालवरमधून दोन गोळ्या झाडल्या. यातील एक गोळी लागून केदार हे जखमी झाले आहेत. प्रत्यक्षदर्शींनी आरोपीला पकडून पोलिसांच्या ताब्यात दिले. तर जखमीला पुढील उपचारासाठी नगर येथे पाठविण्यात आले. ही घटना बुधवार दि. 26 रोजी रात्री 8.30 वाजेच्या दरम्यान घडली. या घटनेने संपूर्ण पाथर्डी तालुका हादरला असून एकच खळबळ उडाली आहे.

पोलीस सूत्राकडून समजलेल्या प्राथमिक माहितीनुसार तालुक्यातील येळी येथील सुभाष विष्णू बडे याचे लग्न झाले होते. आठ वर्षानंतर पती-पत्नीमध्ये घटस्फोट झाला होता. त्यानंतर घटस्फोटीत महिलेने सैदापूर (हत्राळ) येथील युवकाशी विवाह केला होता. त्याच रागातून सुभाष बडे यांनी बुधवारी सायंकाळी सैदापूर (हत्राळ) येथील केदार वस्तीवर जाऊन कुटुंबावर सशस्त्र हल्ला केला.

रिव्हालव्हर मधून झाडलेली गोळी माणिक केदार यांच्या छातीच्या खालच्या भागांमध्ये लागली असून त्यांना पाथर्डी उपजिल्हा रुग्णालयात दाखल करण्यात आले. तेथे प्राथमिक उपचार करून त्यांना नगर येथे हलवण्यात आले आहे. सैदापूर (हत्राळ) येथे झालेल्या हल्ल्यानंतर सुभाष बडे याला जमावाने मारहाण केली. यामध्येे त्याच्या डोक्याला मार लागला आहे.

घटनेची माहिती समजतात पोलीस निरीक्षक संतोष मुटकुळे, उपनिरीक्षक सचिन लिमकर हे सहकार्यासह घटनास्थळी दाखल झाले. तेथे सुभाष बडे याला ग्रामस्थांनी बांधून ठेवलेले होते. त्याला पोलिसांनी ताब्यात घेत घटनास्थळावरून एक पिस्टल आणि कोयता जप्त केला आहे.

जखमी माणिक केदार यांना नगरला हलवल्यानंतर सुभाष बडे याला देखील पाथर्डी उपजिल्हा रुग्णालयात उपचार करून नगर येथे हलविले आहे. याबाबत रात्री उशिरापर्यंत पोलिसात गुन्ह्याची नोंद झालेली नाही. हल्ल्याचे कारण फिर्याद दाखल झाल्यानंतरच उलगडणार आहे.