अखेर श्रीगोंदा मतदारसंघ शिवसेना ठाकरे गटाला

शिवसेना उद्धव ठाकरे गटाने आज शनिवारी आणखी 15 उमेदवारांची दुसरी यादी जाहीर केली आहे. यामध्ये श्रीगोंदा मतदारसंघ महाविकास आघाडीत शिवसेना ठाकरे गटाकडे आला आहे. श्रीगोंद्यातून अनुराधा नागवडे यांना उमेदवारी जाहीर झाली असून समर्थकांकडून जल्लोष साजरा करत आहेत.

नुकतीच राजेंद्र नागवडे व अनुराधा नागवडे यांनी उद्धव ठाकरे यांची भेट घेवून शिवसेना ठाकरे गटात प्रवेश केला होता. या प्रवेशानंतर श्रीगोंदा मतदारसंघातून अनुराधा नागवडे यांची उमेदवारी निश्चित मानली जात होती, त्यावर आज शिक्कामोर्तब करण्यात आले.

सकाळी काँग्रेसने 23 उमेदवारांची दुसरी यादी जाहीर केल्यानंतर शिवसेना उद्धव ठाकरे गटाने आपल्या 15 उमेदवारांची दुसरी यादी जाहीर केली. यामध्ये श्रीगोंदा मतदारसंघातून अनुराधा नागवडे यांच्या नावाचा समावेश असून या अगोदर तेथून भाजपाने प्रतिभाताई पाचपुते यांची उमेदवारी जाहीर केली आहे. यामुळे श्रीगोंद्यातील लढत रंगत होणार असल्याचे बोलले जात आहे.

शिवसेना ठाकरे गटाची दुसरी यादी ः  1) धुळे शहर- अनिल गोटे, 2)चोपडा (अज)- राजू तडवी, 3) जळगाव शहर- जयश्री सुनील महाजन, 4) बुलडाणा- जयश्री शेळके, 5) दिग्रस- पवन श्यामलाल जयस्वाल, 6) हिंगोली- रूपाली राजेश पाटील, 7) परतूर- आसाराम बोराडे, 8) देवळाली (अजा) योगेश घोलप, 9)कल्याण पश्चिम- सचिन बासरे, 10)कल्याण पूर्व - धनंजय बोडारे, 11) वडाळा- श्रद्धा श्रीधर जाधव, 12) शिवडी- अजय चौधरी, 13) भायखळा- मनोज जामसुतकर, 14) श्रीगोंदा- अनुराधा राजेंद्र नागावडे, 15) कणकवली- संदेश भास्कर पारकर यांच्या नावाचा समावेश आहे.