इंडिया आघाडीचे आंदोलन अराजक निर्माण करण्यासाठी

इंडिया आघाडीतील नेत्यांना देशाचे संविधान आणि कायदे मान्य नाहीत. संविधानिक संस्थांवर त्यांचा विश्वास राहिलेला नाही. निवडणूक आयोगाच्या विरोधात त्यांनी सुरू केलेले आंदोलन केवळ देशात अराजक निर्माण करण्यासाठी असल्याचा आरोप जलसंपदा तथा पालकमंत्री राधाकृष्ण विखे पाटील यांनी केला.

माध्यमांशी बोलताना मंत्री विखे पाटील म्हणाले की, जनाधार गमावलेल्या लोकांचे हे आंदोलन आहे. निवडणुकांमधील पराभवानंतर केवळ आपले राजकीय अस्तित्व दाखविण्यासाठी सुरू असलेली ही धडपड असल्याची टीकाही त्यांनी केली.

काँग्रेस नेते राहुल गांधी यांनी यापूर्वी परदेशात जाऊन देशातील संविधानिक संस्थांबाबत वेळोवेळी भूमिका मांडली आहे. त्याचा संदर्भ देत इंडिया आघाडीच्या मागे जनतेचे पाठबळ नसल्याचा दावा विखे पाटील यांनी केला.

महाराष्ट्र लोकसेवा आयोगाच्या प्रश्नावर सुरू असलेल्या आंदोलनाबाबत बोलताना विखे पाटील म्हणाले की, मुख्यमंत्री देवेंद्र फडणवीस यांनी विद्यार्थ्यांशी चर्चा करून या प्रश्नावर मार्ग काढण्याचा प्रयत्न केला आहे. मात्र, काही जणांना केवळ विद्यार्थ्यांच्या प्रश्नाचे राजकीय भांडवल करायचे आहे. त्यामुळे या संपूर्ण प्रकरणाचा विद्यार्थ्यांनीही गांभीर्याने विचार करण्याची आवश्यकता असल्याचा सल्ला त्यांनी दिला.