श्रीगोंद्यात कृषी पर्यटन केंद्राचे उद्घाटन

तालुक्यातील कोरेगाव येथे गोविंदबन कृषी पर्यटन केंद्राचे गुरुवार दि. 26 रोजी मॅक केअर हॉस्पिटलचे संचालक डॉ. सतिष सोनवणे यांच्या हस्ते उद्घाटन करण्यात आले. शहरी भागातील पर्यटकांकरीता हे पर्यटन केंद्र आकर्षणाचा केंद्रबिंदू ठरत आहे. हुरडा पार्टी केंद्र म्हणून दोन वर्षापुर्वी उदयास आलेले हे केंद्र आज ग्रामीण कृषी पर्यटन केंद्र म्हणून नावारूपास आले असून आता महाराष्ट्र शासनाच्या पर्यटन विभागाकडे अधिकृतरीत्या नोंदणी झालेले श्रीगोंदा तालुक्यातील प्रथम व एकमेव ग्रामीण कृषी पर्यटन केंद्र आहे.

गुलाबी थंडीतील निसर्ग रम्य वातावरण, गरमा गरम हुरडा, शेंगदाणा चटणी, तिळाची चटणी यांच्या जोडीला वैविध्यपुर्ण गावरान बाज असणारे चुलीवरील खाद्यपदार्थ, ऊसाचा ताजा रस, बैलगाडी, घोडागाडीतून सफारी, लहान मुलांना खेळण्यासाठी भोवरा, विटीदांडू, गोट्या,लगोर बरोबरच विविध खेळणी, क्रिकेट, व्हॉलीबॉल खेळाची मैदाने,विविध भाजीपाला व फळ पिकांचे प्लॉट, तसेच सेंद्रिय पद्धतीने तयार करण्यात आलेल्या कडधान्य, डाळी, चटण्या, भाजीपाला-फळे यांचे शेतकरी ते ग्राहक संकल्पनेवरील थेट विक्री केंद्र आणि या जोडीला या केंद्राचे चालक बाळासाहेब मोहारे, दादासाहेब साबळे व त्यांच्या कुटुंबियाचे आदरातिथ्य हे या ठिकाणचे विशेष. शहरातील गोंगाट, दररोजची धकाधकीचे जीवन याला कंटाळलेल्या शहरी नागरिकांना हे ग्रामीण कृषी पर्यटन केंद्र मोठ्या प्रमाणावर आकर्षित करत आहे.

कार्यक्रमाला डॉ. सतिश सोनवणे, डॉ. शारदा महांडूळे, डॉ. प्रशांत महांडूळे, डॉ. नयना भापकर, डॉ. संतोष भापकर, श्रीगोंदा तालुका कृषी अधिकारी पद्मनाभ म्हस्के, मंडळ कृषी अधिकारी ज्ञानेश्वर सातपुते, सहकारी सोसायटी संघटनाचे जिल्हाध्यक्ष निलेश पवार, पुणे येथील प्रसिद्ध उद्योजक सुहास इगंवले हे या उद्घाटन प्रसंगी उपस्थित होते.