तीन दिवसात नरभक्षक बिबट्याचा आष्टीत दुसरा बळी

आष्टी तालुक्यातील सुरुडी येथे तरुण शेतकर्‍याचा बळी घेतल्यानंतर सुरुडीपासून जवळच असलेल्या किन्ही (काकडेची) येथे बिबट्याने आज दुसरा बळी घेतला आहे.
आज दुपारी साडेबारा वाजेच्या सुमारास बिबट्याने शेतातील विहिरीवर पाणी देण्यासाठी गेलेल्या दहावर्षीय स्वराज सुनील भापकर या बालकावर झेप घालून उचलून नेले. काही वेळात परिसरात या बालकाचा छिन्नविछिन्न अवस्थेतील मृतदेह आढळून आला. या घटनेने परिसरात प्रचंड दहशतीचे वातावरण निर्माण झाले आहे.

आष्टी तालुक्यात गेल्या काही दिवसांपासून बिबट्याचा उच्छाद सुरू आहे. मोराळा पंचायत समिती गणाच्या सदस्या आशा गर्जे यांचे पती नागनाथ गर्जे यांना बिबट्याने मंगळवारी भरदिवसा शेतात हल्ला करून ठार केले. शेतात तुरीला पाणी घालत असताना ही घटना घडली. या घटनेला दोन दिवस उलटत नाहीत, तोच आज दुपारी साडेबाराच्या सुमारास ही घटना घडली.

स्वराज हा मूळचा श्रीगोंदा तालुक्यातील असून, मावशीच्या पतीबरोबर (काका) तो शेतात गेला होता. मोटार चालू करण्यासाठी विहिरीवर गेला असता तुरीच्या पिकातून आलेल्या बिबट्याने काकासमोर स्वराजला मानेला पकडून उचलून नेले. काकाने आरडाओरडा केला. त्यानंतर शोधाशोध केली असता जवळच्याच डोंगराळ भागात स्वराजचा छिन्नविछिन्न अवस्थेतील मृतदेह आढळून आला.