चिंतादायक दिलासा ः तुर्तास लॉकडाऊन नाही - आरोग्यमंत्री टोपे

राज्यात लॉकडाऊन करण्यासंदर्भात कोणताही निर्णय घेण्यात आलेला नाही. मात्र, आपली सर्व चर्चा त्याच दिशेने सुरु आहे. पण याचा अर्थ राज्यात लॉकडाऊन लागेलच, असा नाही. पण सरकारला तशी तयारी करुन ठेवणे हे गरजेचे असते, असे वक्तव्य आरोग्यमंत्री राजेश टोपे यांनी केले आहे.

यामुळे काही प्रमाणात नागरिकांना दिलासा मिळाला असून हा चिंतादायक दिलासा किती दिवस मिळतो, हे कोरोना संसर्गावरच अवलंबून आहे.

राज्यात 2 एप्रिलपासून लॉकडाऊन होणार याबाबत राज्यात चर्चा सुरू झाली होती. या चर्चेच्या पाश्वभूमीवर एका खाजगी वृत्तवाहिनीशी संवाद साधतांना आरोग्यमंत्री राजेश टोपे बोलत होते.

ते म्हणाले, कोरोना विषाणुचा संसर्ग रोखण्यासाठी राज्यातील नागरिकांनी सोशल डिस्टन्सिंग आणि मास्क घालण्याच्या नियमांचे तंतोतंत पालन केले पाहिजे. यामुळे कोरोना विषाणूची लागण होणारच नाही. परिणामी राज्यात लॉकडाऊनचा प्रश्नच उद्भवणार नाही, असे राजेश टोपे यांनी स्पष्ट केले.

राज्यात 50 टक्के लॉकडाऊन लागणार, हे वृत्त राजेश टोपे यांनी फेटाळून लावले. पण सध्याची परिस्थिती पाहता कठोर निर्बंध लादणे गरजेचे आहे. येत्या एक-दोन दिवसांत या निर्बंधाची घोषणा करण्यात येईल. राज्यातील लोक 15 दिवस गर्दीच्या ठिकाणी गेलेच नाहीत तर कोरोनाची साखळी तुटू शकते.

मात्र, त्यामुळे अनेकांच्या रोजगाराची समस्या उद्भवते. परिणामी आम्ही लॉकडाऊन हा सर्वात शेवटचा पर्याय ठेवला आहे.

शेवटी जीव वाचवायचा असेल तर लॉकडाऊन करणे भागच आहे, असा इशाराही राजेश टोपे यांनी दिला.