इच्छुकांनी साधला गुरुपुष्यामृतचा योग

शेवगाव-पाथर्डी विधानसभा मतदार संघ निवडणुकीसाठी इच्छुकांनी आज गुरुपुष्यामृतचा योग साधत आपले उमेदवारी अर्ज दाखल केले. उमेदवारी अर्ज भरण्याच्या तिसर्‍या दिवशी सात इच्छुकांनी आपले उमेदवारी अर्ज दाखल केले. यामुळे आतापर्यंत 10 उमेदवारांनी 13 अर्ज दाखल केले असल्याची माहिती निवडणूक निर्णय अधिकारी तथा प्रांताधिकारी प्रसाद मते यांनी दिली.

शेवगाव पाथर्डी विधानसभा मतदारसंघ निवडणुकीसाठी पहिल्या दिवशी राजेंद्र रंगनाथ ढाकणे, पांडुरंग गोरक्ष शिरसाट व हर्षदा विद्याधर काकडे यांनी उमेदवारी अर्ज दाखल केले होते. दुसर्‍या दिवशी किसन महादेव आव्हाड यांच्यासह राजेंद्र रंगनाथ ढाकणे व पांडुरंग गोरक्ष शिरसाट यांनी अर्ज दाखल केले होते.

आज तिसर्‍या दिवशी इच्छुकांनी गुरुपुष्यामृतचा योग साधत आपले अर्ज दाखल केले. यामध्ये मोनिका राजीव राजळे, चंद्रशेखर मारुतराव घुले, प्रताप बबनराव ढाकणे, प्रभावती प्रताप ढाकणे, हर्षदा विद्याधर काकडे, दिलीप खेडकर, रत्नाकर जावळे या सात जणांनी अर्ज दाखल केले आहेत. तर आज 5 जणांनी 6 अर्ज नेले आहेत.

निवडणूक निर्णय अधिकारी म्हणुन प्रांताधिकारी प्रसाद मते हे काम पहात असून त्यांना तहसीलदार प्रशांत सांगडे व तहसीलदार उद्धव नाईक हे सहाय्य करत आहेत. मतदारसंघात अजुनही महाविकास आघाडीची उमेदवारी जाहीर झाली नाही. त्यातच ढाकणे पती-पत्नीने उमेदवारी अर्ज दाखल केल्याने उमेदवारी कोणाला मिळणार याकडे नागरिकांचे लक्ष लागून राहीले आहे.