पाथर्डी पंचायत समिती गणांचे आरक्षण जाहीर

नुकतेच पंचायत समिती सभापतीपदाचे आरक्षण जाहीर झाल्यानंतर आज सोमवारी तहसील कार्यालयात गणांची आरक्षण सोडत काढण्यात आली. सभापतीपदी अनुसूचित जाती महिला राखीव झाल्यानंतर हे आरक्षण कोणत्या गणासाठी निघते याकडे सर्वांच्या नजरा होत्या. अखेर आज झालेल्या आरक्षण सोडतीमध्ये कासार पिंपळगाव गणाला सभापतीपदाचा मान मिळाला आहे.

पाथर्डी तहसील कार्यालयात प्रांताधिकारी प्रसाद मते यांच्या अध्यक्षतेखाली झालेल्या बैठकीत तालुका पंचायत समितीच्या 10 गणांसाठी आरक्षण सोडत झाली. यामध्ये (कंसात आरक्षण) पुढील प्रमाणे कासार पिंपळगाव गण ः (अनुसूचित जाती, महीला राखीव), तिसगाव गण ः (नागरिकांचा मागास प्रवर्ग, महीला राखीव), माळी बाभुळगाव गण ः (नागरिकांचा मागास प्रवर्ग, खुला), माणिकदौंडी गण ः (सर्वसाधारण, महिला), मिरी गण ः (सर्वसाधारण, खुला), टाकळी मानुर गण ः (सर्वसाधारण, महीला), करंजी गण ः (सर्वसाधारण, महीला), अकोला गण ः (सर्वसाधारण, खुला), कोरडगाव गण ः (सर्वसाधारण, खुला), भालगाव गण ः (सर्वसाधारण, खुला) असे आरक्षण निघाले.

तहसील कार्यालयात झालेल्या बैठकीत लहान मुलगी युगंधरा गर्जे हीच्या हस्ते सोडत काढण्यात आली. यावेळी तहसीलदार डॉ. उद्धव नाईक, नायब तहसीलदार दिग्विजय पाटील, रविंद्र शेकटकर, दादासाहेब वावरे आदी अधिकारी व विविध पक्षाचे पदाधिकारी, कार्यकर्ते व महिला उपस्थित होते.