पोलिसांनी पकडला एक लाखाचा गुटखा

टाटा इंडिका कारमधून विक्रीसाठी चालवलेला सुगंधी तंबाखू व गुटखा श्रीगोंदा पोलिसांनी शनिवार दि. 28 रोजी रात्री 9 वाजेच्या सुमारास श्रीगोंदा-मांडवगण रस्त्यावरील गणपती मळ्याजवळ पकडला आहे. गाडीत तब्बल 1 लाख 2 हजार तिनशे बत्तीस रुपयांचा गुटखा जप्त करून दोन आरोपींला ताब्यात घेऊन गुन्हा दाखल केला आहे.

श्रीगोंदा पोलीस ठाण्याचे निरीक्षक रामराव ढिकले यांना खबर मिळाली की, श्रीगोंदा-मांडवगण रस्त्यावरून एक टाटा इंडिका कारने बेकायदेशीररीत्या गुटखा व सुगंधी तंबाखू विक्रीसाठी चालवलेला आहे. रात्री 9 वाजेच्या सुमारास श्रीगोंदा पोलिसांनी गणपती मळ्याजवळ गाडी अडवली असता गाडीत हिरा गुटखा व रॉयल 717 सुगंधी तंबाखू आढळून आली. इंडिका कार व गुटख्याच्या पुड्या मिळून एकूण 1 लाख 2 हजार 332 रुपयांचा मुद्देमाल जप्त केला आहे.

पोलीस हवालदार प्रताप देवकाते यांच्या फिर्यादीवरून विशाल बोत्रे व नवनाथ शिंदे दोघेही (रा. आढळगाव, ता. श्रीगोंदा) यांच्याविरोधात विनापरवाना बेकायदा गुटखा बाळगून विक्री करण्याच्या उद्देशाने वाहतूक करताना आढळुन आल्याने श्रीगोंदा पोलीस ठाण्यात गुन्हा दाखल करण्यात आला आहे. पुढील तपास मुख्य पोलीस हवालदार आर. बी. झुंझार करत आहेत.