राखीव जागेवर निवडणूक लढवणार्‍या इच्छुकांसाठी महत्वाची बातमी

राखीव जागांवर ग्रामपंचायत निवडणूक लढवू इच्छिणार्‍या उमेदवारांसाठी निवडणूक आयोगाने एक चांगला निर्णय घेतला आहे. राखीव जागांवर जात वैधता प्रमाणपत्र नसल्यास पडताळणी समितीकडे हे प्रमाणपत्र मिळविण्यासाठी केलेल्या अर्जाची सत्यप्रत अथवा पोचपावती किंवा अर्ज केल्याबाबतचा कोणताही पुरावा सादर करण्याची मुभा आहे, अशी माहिती राज्य निवडणूक आयुक्त यू. पी. एस. मदान यांनी दिली आहे.

यामुळे राखीव जागेवर निवडणूक लढवविणार्‍यांना दिलासा मिळाला असून आता जात प्रमाणपत्र नसलेल्या उमेदवारांनाही निवडणुकीच्या रिंगणात उतरण्याची संधी मिळणार आहे. यामुळे ग्रामपंचायत निवडणुकीत इच्छुकांची भाऊगर्दी पहायला मिळणार आहे.

याबाबत माहिती देतांना मदान यांनी सांगितले की, राज्य निवडणूक आयोगाने 11 डिसेंबर 2020 रोजी जाहीर केलेल्या ग्रामपंचायतींच्या निवडणुकांसाठी 30 डिसेंबर 2020 पर्यंत नामनिर्देशनपत्र दाखल करण्याची अंतिम मुदत आहे.

राखीव जागांवर निवडणूक लढविण्यासाठी नामनिर्देशपत्र दाखल करताना जातवैधता प्रमाणपत्र नसल्यास जात पडताळणी समितीकडे जात वैधता प्रमाणपत्रासाठी केलेल्या अर्जाबाबतचा पुरावा सादर करण्याबरोबरच एक हमीपत्रही देणे आवश्यक राहील. विजयी झाल्याच्या दिनांकापासून 12 महिन्यांच्या आत पडताळणी समितीने दिलेले जात वैधता प्रमाणपत्र सादर केले जाईल, असे या हमीपत्रात नमूद करावे लागणार आहे.