पाथर्डी । वीरभूमी- 24-Aug, 2022, 10:14 PM

शेतकर्‍यांचा महत्वाचा समजला जाणारा बैलपोळा सण दोन दिवसांवर येऊन ठेपला. या पार्श्वभूमीवर आज पाथर्डी कृषी उत्पन्न बाजार समितीतील आठवडे बाजारात बैलांची मोठी खरेदी विक्री होत आहे.

यानिमित्त एका शेतकर्‍याने आज 3 लाख 61 हजार रुपयांना उच्चांकी भावाने बैलाची जोडी खरेदी करत सजवलेल्या बैलाची डीजेच्या तालावर गुलालाची उधळण करत वाजत-गाजत मिरवणूक काढली.

यावेळी ही मिरवणूक पाहण्यासाठी शेतकर्‍यांनी व शहरातील तसेच आठवडे बाजारासाठी आलेल्या तालुक्यातील नागरिकांनी मोठ्या संख्येने गर्दी केली होती.

आजच्या युगात शेती मशागतीसाठी यांत्रिक अवजारे उपलब्ध असतानाही शेतकर्‍यांचे आपल्या भरवशाच्या जीवलग साथीदार बैलांवरील प्रेम व विश्वास कमी झाला नाही. सदर विक्रमी 3 लाख 61 हजार रुपयांची बैल जोडी विकणारे शेतकरी हे तालुक्यातील पागोरी पिंपळगाव येथील सादीक मकबुल शेख हे आहेत.

तर विकत घेणारे शेतकरी हे अहमदनगर येथील अशोक शेळके हे आहेत. आज दिवसभर सदर बैलजोडी व विक्रमी व्यवहारांची बाजारात चर्चा रंगली होती.